अन्तर्राष्ट्रिय अपराधी चाल्र्स शोभराज बयान दिन अदालत जाँदा मंगलबार पनि उनकी 'श्रीमती' निहिता विश्वास र 'सासु' शकुन्तला थापासँगै गए । निहिता र शकुन्तला अदालत पुगेपछि झै झगडा त भइहाल्छ, हल्काफुल्का मंगलबार पनि भयो ।
नेसनल टेलिभिजनका अध्यक्ष युनुस अन्सारीलाई गोली हान्ने मनमितको मतियार बनेको आरोपमा काठमाडौं जिल्ला अदालतले शोभराजलाई बयानका लागि उपस्थित गराउन प्रहरीलाई आदेश दिएको थियो । प्रहरीले केन्द्रीय कारागारको गोलघरबाट शोभराज मंगलबार दिउँसो करिब १ बजे अदालत पुर्याएको थियो । अदालतमा पहिले नै निहिता र शकुन्तला उनको प्रतीक्षामा थिए ।
निहितालाई इजलासमा जान प्रहरीले रोकेपछि आमा-छोरी विवादमा उत्रिएका थिए । शकुन्तलाले शोभराजलाई अदालत लिएर गएका प्रहरीसँग तँतँ मम गर्दै झगडा गर्न थालिन् ।
प्रहरी कुनै पनि हालतमा निहितालाई भित्र जान नदिने अडानमा थियो । तर, अंग्रेजीमा बयान दिने शोभराजको भाषा सहयोगी -इन्टरप्रेटर) अरू कोही नभएपछि अदालतले नै निहितालाई इजलासमा बोलायो । यसरी, छोरी भाषा सहयोगीका रूपमा र आमा अधिवक्ताका रूपमा भित्र पसेपछि विवाद सकियो । आमा-छोरीको सहयोगमा शोभराजले बयान पनि दिए ।
कारागार गोलीकाण्डका बारेमा शोभराजसँग करिब तीन घन्टा बयान लिइएको थियो । मनमितले आफू अमेरिकाबाट आएको पत्रकार भएको बताएकाले उसलाई भेटेको, तर गोलीकाण्डका बारेमा केही पनि जानकारी नभएको दाबी गरेका थिए । शोभराजलाई भेट्ने बहानामा जेलभित्र गएका मनमितले अन्सारीलाई गोली हानेका थिए ।
बयान सिद्धिएपछि शोभराजसँगै निहिता पनि अदालतको गेटसम्म आएकी थिइन् । गेटमा उनीहरू बिदा माग्दै छुट्टएिका थिए । फोटो पत्रकारहरूलाई शोभराजले 'इट्स इनफ फर टुडे,' -आजलाई फोटो खिच्न पुग्यो) भन्दै हात हल्लाएका थिए ।
पहिलेभन्दा निहिता निकै दुब्लाएकी थिइन् । दुब्लाएको सम्बन्धमा पत्रकारको जिज्ञासामा उनले भनिन्, 'आई एम गेनिङ माई वेट -अहिले त म मोटाउँदै छु) ।' आमा शकुन्तलाका अनुसार बिरामी भएर निहिता दुब्लाएकी हुन् ।
शोभराजमाथिको नयाँ अभियोगका सम्बन्धमा सोधिएको प्रश्नमा उनले युनुसलाई गोली हान्ने भारतीय नागरिक मनमितसँग पत्रकारका रूपमा भेटेको र घटनामा उनको कुनै संलग्नता नरहेको जिकिर गरिन् । 'तपाईंहरूजस्तै पत्रकारका रूपमा उसले भेटेको हो, नियमअनुसार जसलाई भेट्न पनि पाउँछ,' उनले भनिन् ।
मंगलबार अदालतले शोभराजका अलावा अन्सारीलाई गोली हान्ने मनमित सिंह र गोलीकाण्डमा सहयोग गर्ने केन्द्रीय कारागारका अर्का कैदी भारतीय नागरिक अमर टन्डनलाई पनि बोलाएको थियो । मनमित हातहतियार तथा खरखजाना मुद्दामा यसअघि नै पुर्पक्षका लागि जेल चलान भइसकेका छन् । गत २८ वैशाखमा मनमितसहित शोभराज र टन्डनविरुद्ध जिल्ला सरकारी वकिल कार्यालयले जिल्ला अदालतमा ज्यान मार्ने उद्योगमा मुद्दा दायर गरेको थियो । टन्डन लागुऔषध तथा अपहरण घटनामा जेल परेका हुन् । मुद्दामा आदेश भने बुधबार आउँदै छ ।
शृंखलाबद्ध हत्याका अभियोगमा जन्मकैदको सजाय पाएका प|mान्सेली नागरिक शोभराज कारागार गोलीकाण्डपछि गोलघरमा रहँदै आएका छन् । अन्सारीमाथि २६ फागुनमा केन्द्रीय कारागारको भेटघाट कक्षमा भारतीय नागरिक मनमित सिंहले गोली हानेका थिए । अन्सारी कोखामा गोली लागी घाइते भएका थिए ।
अन्सारीको हत्या योजनामा मनमितले शोभराजसँग १३ पटकसम्म भेटेका थिए । जुन कुरा शोभराजले पनि मंगलबारको बयानमा स्वीकारेका छन् । तर, पत्रकारका रूपमा मात्र सहयोग गरेको उनको दाबी छ ।
प्रहरी प्रतिवेदनअनुसार आफ्नो मुद्दालाई अन्तर्राष्ट्रिय अदालतमा लैजान सहयोग गर्ने समझदारीमा शोभराजले हत्या योजनामा सहयोग गरेका थिए । शोभराजको मुद्दालाई अन्तर्राष्ट्रिय अदालतमा लैजानका लागि बनाइएको फाइल प्रहरीले भक्तपुरको बोडेस्थित अभियुक्तहरूको कोठाबाट फेला पारेको थियो । शोभराजलाई भेट्न मनमितले उनकी सासु तथा अधिवक्ता शकुन्तला थापाको सहारा लिएका थिए । जुन कुरा अधिवक्ता थापाले पनि स्वीकारेकी छिन् । उनले पनि पत्रकारका रूपमा अमेरिकाबाट आएको भनेर आफूले मनमितलाई शोभराजसँग भेटाएको बताएकी छिन् ।
अन्सारीका बारेमा जानकारी लिन सुरुमा भने अपहरणको अभियोगमा जेल परेका भारतीय नागरिक टन्डनकै सहयोग लिइएको थियो । तर, पछि उनलाई युनुस रहेको केन्द्रीय कारागारबाट सँगै रहेको भद्रजेलमा सरुवा गरिएपछि उनीहरूले शोभराजको सहयोग लिएका थिए । मनमितले दिएको बयानमा शोभराज र टन्डनबीच झगडा भएपछि टन्डनलाई भद्रजेलमा सारिएको थियो, त्यसपछि उनीहरूले शोभराजको सहयोग लिएका हुन् ।
घटनाका सम्बन्धमा युनुसका बुबा सलिम मियाँ अन्सारीले २९ फागुनमा शोभराज र टन्डनसहित अन्य आठ व्यक्तिविरुद्ध प्रहरीमा किटानी जाहेरी दिएका थिए ।
