-हरिवंश आचार्य
हुन त यो मेरो व्यक्तिगत जीवनको कुरा हो ।
सबैले चिन्ने मान्छे भएको कारण चासो हुनु स्वभाविक नै हो । श्रीमती मिरा
नभएपछि एक वर्षभन्दा बढी समय मैले एक्लै जीवन बिताएँ । मैले के बिचार गरें
भने जीवन सहज र संयमित भयो भने ७५, ८० वर्षसम्म बाँच्न सकिन्छ । हिसाब
गर्दाखेरी म अझै २०, २५ वर्ष बाँच्छु जस्तो लाग्छ । यत्रो जिन्दगीमा एक्लो
भएर बस्नु कत्तिको ठीक हो, मैले आफूलाई कत्तिको न्याय गर्छु त भन्ने हिसाब
पनि मैले गरें । श्रीमती जीवित हुँदा उनलाई गर्नुपर्ने जुन कर्तव्य थियो,
मैले पूरा गरें ।
उनले छोडेर गैसकेपछि अब उनी आत्मामा मात्र
बस्ने मान्छे भइन । अब त उनी मेरो लागि देवी, भगवती भइन् । भगवानलाई
पाउँछु भनेर सधैं आश गरेर बस्ने कुरा पनि भएन । त्यसकारण मैले आफ्नो
जिन्दगीको लागि केही सोच्नुपर्छ भन्ने ठानें । र सोच्न पनि जरुरी थियो ।
किनभने घरमा पनि धेरै परिवार भयो भने सजिलो हुन्छ होला । घरमा जम्मा दुईजना
परिवार । एउटा छोरा अमेरिकामा छ । अर्कोले आफ्नै व्यवसाय शुरु गरेको छ ।
बेलुका घर फर्किंदा समय लाग्छ, अबेर हुन्छ । घरमा पुग्दा एक्लै । साथीको
घरमा कति जानु । घरमा एक्लै हुँदा अत्यास लाग्न थाल्यो ।
धेरै मान्छेले श्रीमती विवाह गरेपछि
पुनर्विवाह गरेका छन् । ठूला ठूला मान्छेले पनि गरेका छन् । श्रीमती
हुँदाहुँदै मैले विवाह गरेको भए यो अपराध हुन्थ्यो । मिरा नभैसकेपछि मैले
मेरो जिन्दगीको लागि सोच्नुपर्ने जरुरी थियो । छोराहरुको भाव पनि यस्तै
थियो । साथीहरुको सल्लाह पनि यस्तै भयो । त्यसकारण मैले यो निर्णय गरेको हो
। मदन दाइले धेरै सम्झाउनुभयो । तिमी यसरी बस्दा हाम्रो काममा बाधा हुन्छ
भन्नुभयो । भाउजु, दिदीहरु, मेरो छोराहरु सबैले यस्तै कुरा गरे । अनि मेरो
पनि व्यक्तिगत निर्णयले यसो गरें ।
अब घरमा मैले बोल्ने साथी पाएको छु ।
आफ्नो माया गर्ने मान्छे, जीवनसाथी भन्ने कुरा प्रकृतिले दिएको कुरा हो ।
यसो हुँदा त मेरो जीवन, पारिवारिक अवस्था र काममा पक्कै पनि फरक हुन्छ ।
मैले एउटै कुरा के भन्छु भने, मैले गलत
काम गरेको छैन । म पनि मानव हो । मैरो पनि नीजि जीवन हुन्छ । यसबाट
मेरोबारेमा समाजमा नराम्रो सोच्नुपर्ने केही छैन जस्तो लाग्छ मलाई ।
संसारमा कति मानिसका श्रीमान बितेका छन्, श्रीमती बितेका छन्, फेरि पनि
पुनर्विवाह गरेका छन् । मेरो पनि यस्तै उदाहरण हो । यसलाई मैले सहज ढंगले
नै लिएको छु । आशा छ समाजले पनि सहज ढंगले नै लिनेछ । श्रीमती हुँदाहुँदै
कसैसँग त्यस्तो सम्बन्ध राखेर हिंड्ने गरेको भए दर्शक र मेरा
शुभेच्छुकहरुको धारणामा चोट पर्न सक्थ्यो । अहिले दर्शकहरुकै सल्लाहले पनि
यसो गरेको हुँ । धेरैजनाले मलाई एक्लै बस्न हुन्न भन्नुभएको थियो ।
त्यसकारण मैले जे गरें, ठीक गरें जस्तो लाग्छ । कतिपय कुरा कसैलाई मन पर्छ,
कसैलाई पर्दैन । यो कुरा दर्शकहरुकै हातमा छोडिदिनुपर्छ ।
(हास्यकलाकार हरिवंश आचार्यसितको कुराकानीमा आधारित । आचार्यले बिहीबार दोस्रो विवाह गर्नुभएको छ ।)
