दुई वर्षदेखि निर्माणाधिन यो पार्कको बुधवार उद्घाटन गरियो, उद्घाटनका दिन यो पार्कमा सर्वसाधारणलाई निशुल्क प्रवेशको व्यवस्था गरिएको थियो । सञ्चालक भरत गिरीले बुधवार मात्रै पार्कमा ३५ हजार बढीले मनोरञ्जन लिएको जानकारी दिए । उद्घाटनका दिन निशुल्क प्रवेशको व्यवस्था गरेका थियौं, भीडलाई साढे दुई घण्टाभन्दा बढी थेग्न नसकेपछि बुधवारका लागि फनपार्क बन्द गर्यौं, उनले भने ।
फनपार्क खुल्न थालेपछि काठमाडौं–भक्तपुरको अरनिको हाइवोमा जाम लागेको थियो, पहिलो दिननै ‘ओभर रेस्पोन्स’ पायौं, भित्र पार्कमा हजारौंको भीड लाग्यो, बाहिर पार्किङ्ग भरिभराउ थियो, सडकमा समेत जाम लागेपछि बुधवारका लागि पार्क बन्द गरेका हौं, गिरीले बिजमाण्डूसँग भने ।
बिहिवारदेखि भने पार्क प्रवेशमा शुल्क लाग्नेछ, गिरीका अनुसार पाँच हजार क्षमताको यो मनोरञ्जन उद्यानमा प्रवेश गर्न जोडीलाई हजार रुपैयाँ, एकल व्याक्तिलाई छ सय रुपैयाँ र बच्चालाई चार सय रुपैयाँ लाग्नेछ ।
कोटेश्वरबाट १२ किलोमिटर, कोटेश्वर–सूर्यविनायक चार लेन सडकको अन्तिम विन्दु सूर्यविनायक चोकबाट चार किलोमिटर दूरीमा काठमाडौं फन भ्यालीमा पुग्न सकिन्छ । फन भ्यालीमा वाटर पार्क, अम्युजमेन्ट पार्क, लेजी रिभर, गो कार्टिङ र लार्जेस्ट वेभ पुलमा मनोरञ्जल लिन सकिने व्यवस्था छ ।
पार्कमा १२ वटा ‘गेमिङ जोन’ र तीनवटा ‘वाटर जोन’ छन्, पार्कमा इलेक्ट्रिक कार, रोटेपिङ्ग शैलीको हेलिकोप्टर, ४० फिट उचाईको ह्विल चेयर ट्रेन, वेभ पुल, ४० फिट उचाईबाट १५० देखि २०० फिटसम्म स्लाइडिङ गर्न मिल्ने पुल छन् ।
मनोरञ्जन पार्कमा थ्रीडि सिनेमा हल र फुड कोर्टको समेत व्यवस्था छ । फुड कोर्टमा मदिरा र चुरोटजन्य पदार्थ उपलब्ध नहुने पनि गिरीले बताए । यो शुद्ध मनोरञ्जन पार्क हो, यहाँ वियरसमेत पाइने छैन्, उनले जानकारी दिए ।
सञ्चालक गिरीले मनोरञ्जन पार्कमा सुरक्षासम्वन्धी सम्पूर्ण पूर्वतयारी भएको जानकारी दिए, उनले भने पार्कमा गुणस्तरीय उपकरणहरु राखिएको छ, जोखिमस्थानमा लाइफगार्ड राखेका छौं ।
मनोरञ्जन पार्कको आधा जग्गा सञ्चालकहरुको भएको र बाँकी हिस्सा लिजमा लिएको जानकारी पनि सञ्चालक गिरीले दिए, अघिपट्टिको भाग हाम्रो आफ्नै हो, पछिको भाग १६ वर्षका लागि लिजमा लिएका छौं । उनले देशको राजनीतिक अवस्था सुध्रिए, पर्यटन उद्योगमा सुधार भए र नेपालीको जीवनशैलीमा स्तरोन्नती भए आगामी छदेखि आठ वर्ष भित्र ‘ब्रेक इभन’मा जान सकिने जानकारी दिए ।
दुई वर्षदेखि निर्माण भैरहेको यो परियोजना छ महिना अघि नै पूरा हुनुपर्ने भए पनि स्थानीय वासिन्दाको अवरोधका कारण समस्या सिर्जना भएको थियो । स्थानीयवासिन्दालाई यो नाइट क्लव, डिस्को जस्तो लागेको थियो, तर यो मदिरा र सूर्तिजन्य वस्तु पनि नपाईने शुद्ध मनोरञ्जनात्मक पार्क हो भन्ने बुझाएपछि अहिले समस्या छैन्, सञ्चालक गिरीले जानकारी दिए ।
यो पार्कमा ४० जनाले प्रत्यक्ष रोजगारी पाएको जानकारी पनि सञ्चालक गिरीले दिए, त्यसबाहेक सुरक्षा र सफाइको जिम्मेवारी ‘आउटसोर्स’ गरेका छौं, उनले भने । पार्कमा ‘स्किल म्यानपावर’बाहेक अरु सबै स्थानीयले रोजगारी प्राप्त गरेको पनि उनले बताए ।
सञ्चालक भरत गिरीले यो पार्कलाई नेपाली ‘वाटर किंगडम’का रुपमा व्याख्या गरे, यो विदेशकै ब्राण्डिङ्ग ‘वाटर किंगडम’ होइन् तर यो नेपाली ‘वाटर किंगडम’ हो, त्यहाँ हुने अधिकांश सेवा र सुविधा हामीले यहाँ पनि उपलब्ध गराएका छौं, भविष्यमा थप सेवा सुविधा थपिने जानकारी पनि उनले दिए ।
यो पार्कका लागि आवश्यक पर्ने सबै सामाग्री भारतको हरियाणाबाट आयात गरिएको हो, युरोप पुग्दा, अमेरिका जाँदा, चीन घुम्दा यस्ता पार्क देखेको थिएँ, त्यस्तै पार्क नेपालमा किन नखोल्ने भनेर यो पार्क खोलेका हौं, उनले भने । काठमाडौंमा भएको मध्यमवर्गीय मान्छेले यसलाई रुचाए, हामी सफल पनि हुनेछौं, पहिलो दिनको प्रतिक्रियाले हामीलाई उत्साहित गराएको छ, सञ्चालक गिरीले जानकारी दिए ।
खै-खै म पनि हेर्छुः फन भ्यालीमा नजर लगाउँदै स्थानीय किसान महिला
