१९
पुस, काठमाडौं । एमाओवादी अध्यक्ष प्रचण्डलाई एकातिर देश र पार्टीको
चिन्ता छ भने अर्कातिर परिवारमा एकपछि अर्को समस्या थपिएको छ । सीताको
उपचार गरे पनि छोरीको उपचार कसरी गर्ने भन्ने चिन्तामा छ यतिबेला प्रचण्ड
परिवार । नेता प्रचण्ड आफ्ना परिवारका सदस्यमा देखिएको स्वास्थ्यसम्बन्धी
जटिल समस्याका कारण चिन्तामा डुब्न थाल्नुभएको छ । उहाँ आफैं पनि उच्च
रक्तचापको बिरामी हुनुहुन्छ । यसरी उच्च रक्तचाप भएको व्यक्तिले तनावबाट
जोगिनुपर्ने डाक्टरहरुले सल्लाह दिने गरेका छन् ।
पत्नी सीताको मृगौलामा समस्या देखिएपछि
उपचारका लागि उहाँलाई लिएर प्रचण्ड शुक्रबार बैंकक जानुभएको थियो । सोमबार
प्रचण्ड दम्पत्ति नेपाल फर्किइसकेको छ । उपचारका क्रममा सीताको ‘लिभर’मा
समेत समस्या देखिएको र डाक्टरले औषधि लेखिदिएको लाजिम्पाट स्रोतको कथन छ ।
तर, आमालाई उपचार गराए पनि जेठी छोरी ज्ञानु दाहाल (केसी) मा स्तन
क्यान्सरको जटिल समस्या थपिएपछि प्रचण्ड परिवारमा अर्को तनाव उत्पन्न भएको छ
। ‘ज्ञानुको दिल्लीमा पहिल्यै उपचार गरिएको हो, तर समस्या समाधान भएन, अब
कहाँ उपचार गर्ने भन्ने चिन्ता बढेको छ ।’-प्रचण्ड निकट स्रोतले
अनलाइनखबरसँग भन्यो । एमाओवादीको अर्को स्रोतले दिएको जानकारी अनुसार
ज्ञानुलाई उपचारका लागि अमेरिका लानुपर्ने डाक्टरले सल्लाह दिएका छन् ।
अमेरिकामा उपचार गर्न महंगो पर्ने भएकाले पनि परिवारमा तनाव बढेको स्रोत
बताउँछ । हालैमात्र पाठेघरमा क्यान्सर देखिएपछि नायिका मनिषा कोइरालालाई
समेत अमेरिका लगिएको थियो ।
स्तन क्यान्सरको समस्यासँग जुधिरहेकी जेठी
छोरी ज्ञानु आफ्ना श्रीमान अर्जुन केसीसँग हात्तीवनमा बस्दै आउनुभएको छ ।
उहाँका दुई छोरीहरु छन् ।प्रचण्ड र सीताको परिवारमा तीन छोरी र एक छोरा छन्
। बिरामी ज्ञानु जेठी हुन् भने माइली रेणु दहाल (पाठक) पूर्वसभासद् हुन् ।
जेठा ज्वाइँको नाम अर्जुन केसी र माइलाको नाम अर्जुन पाठक हो । कान्छी
गंगा दहालले पहिलो पतिसँग सम्बध बिच्छेद भएपछि गतवर्ष बिराटनगरका किशोरसँग
विवाह गरेकी छन् । गंगाकी छोरी स्मिता प्रधान बाल गायिका हुन् । हाल
परिवारको सम्पर्कभन्दा बाहिर रहेका प्रकाश दाहाल प्रचण्डका एकमात्र छोरा
हुन् । प्रचण्डकी बुहारी (प्रकाशकी जेठी पत्नी) र नातिको रेखदेख अभिभावकको
भूमिका पनि प्रचण्ड र सीताकै काँधमा छ ।
