- वाईवाईको असममा दैनिक ६० लाख प्याकेट उत्पादन गर्ने उद्योग
- १३ अर्ब भारुको चाउचाउ बजारमा वाइवाइको १६ प्रतिशत हिस्सा
- वार्षिक ५० करोड प्याकेट उत्पादन गरी १६ अर्बको विक्री गर्ने लक्ष्य
- भारतमा सीजी फुडको ब्राण्ड मूल्य मात्रै १० करोड डलरभन्दा बढी
- टाटाको कम्पनी ताल एशियामा पनि चौधरी समूहको ५० प्रतिशत लगानी
- टाटा, कन्जर्भेसन कर्पोरेशन अफ्रिकासँग मिलेर वाइल्डलाइफ पर्यटनमा पनि लगानी
विस्तार हुँदै सीजी : चौधरीको भारतीय कम्पनी सीजी फुड इण्डियाले असमको गुहाटीमा खोलेको उद्योग
सिलचरमा लगाएको चौधरीको यो प्लान्ट अहिलेसम्मकै ठूलो हो, कामरुपमा लगाएको प्लान्टबाट दैनिक नौ लाख बढी प्याकेट चाउचाउ उत्पादन हुने गरेको छ भने सिलचरको प्लान्टबाट छ गुणा बढी चाउचाउ उत्पादन हुन्छ । सिलचरमा लगाएको प्लान्ट आउनुअघि चौधरी समूहका तीन प्लान्टबाट दैनिक १८ लाख प्याक वाइवाई उत्पादन हुन्थ्यो । अब यो क्षमता चार गुणाले बढेर दैनिक ८० लाख प्याक पुगेको छ ।
भारतको उत्तरपूर्वी भागमा वाईवाईले बजारको ६५ प्रतिशत हिस्सा ओगटेको कम्पनीका प्रमुख कार्यकारी अधिकृत जीपी शाहले तीन महिना अघि कोलकत्ताबाट प्रकासित हुने टेलिग्राफलाई जानकारी दिएका थिए । भारतमा १३ अर्ब भारुको चाउचाउ बजार भएको र त्यसको १६ प्रतिशत हिस्सा वाईवाईसँग रहेको जानकारी पनि टेलिग्राफले दिएको छ ।
शाहले भारतमा चाउचाउ बजार वार्षिक २० प्रतिशतले वृद्धि भैरहेको जानकारी दिंदै पाँच वर्षमा वाईवाईको बजार तीन गुणा बढाउने दावी गरेका थिए, उनले पाँच वर्ष भित्र असममा मात्रै दुई हजारलाई रोजगारी दिने र अहिले छ सय जनाले रोजगारी पाएको जानकारी पनि दिएका थिए । उनले उत्तरपूर्वी भारतबाट चौधरी समूहलाई ५० प्रतिशत आम्दानी हुने जानकारी पनि दिएका थिए ।
२०१३ भित्र भारतमा वार्षिक ५० करोड प्याकेट चाउचाउ उत्पादन गरी वार्षिक १६ अर्ब नेपाली रुपैयाँ बराबरको विक्री गर्ने लक्ष्यसाथ नयाँ प्लान्ट खोलिएको हो । चौधरी समूहको लगानी रहेको सीजी फुड्स इन्डिया प्रा. लीले असमको सिलचरमा पाँचौं प्लान्ट लगाएको चौधरी समूहका प्रवन्ध निर्देशक निर्वाण चौधरीले जानकारी दिएका छन् । १० वर्ष अघि भारतको असममा दर्ता गरिएको सीजी फुड इन्डियाले वाइवाई उत्पादनका लागि सन् २००६ मा भारतको सिक्किममा पहिलो प्लान्ट लगाएको थियो । कम्पनीले भारतमा ब्राउन र ह्वाइट चाउचाउ, क्विक चिज बल्स र अन्य स्न्याक उत्पादन गरिरहेको छ ।
छ एकड जमिनमा फैलिएको सिक्किमको प्लान्टबाट चार सय जनालाई रोजगारी पुगेको छ । प्रवन्ध निर्देशक चौधरीले वाईवाईको चौथो प्लान्ट असममै सबैभन्दा बढी रोजगारी सिर्जना गर्ने उद्योग भएको बताएका थिए ।
कम्पनीले आफ्नो दोस्रो प्लान्ट सन् २००८ मा उत्तराञ्चलको रुद्रपुरमा लगाएको थियो । स्टेट इन्डष्ट्रियल कर्पोरेशन उत्तराञ्चलमा लगाएको यो प्लान्टबाट वार्षिक ९०० मेट्रिक टन चाउचाउ उत्पादन गर्न सकिन्छ । यो प्लान्टमा २० करोड भारु ३२ करोड नेपाली रुपैयाँ लगानी भएको छ ।
तीन एकड क्षेत्रफलमा फैलिएको यो प्लान्टले हक्का चाउचाउ, मामा पुन्टे भुजिया उत्पादन गरिरहेको छ । कम्पनीले सन् २०१० मा असमको गुहाटी छायागाउँ इन्डष्ट्रियल स्टेटमा तेस्रो कारखाना लगाएको हो । कम्पनीले यहाँ पनि चाउचाउ उत्पादन गर्छ । यहाँ उत्पादन भएको चाउचाउ विश्वका २५ मुलुकमा निर्यात भैरहेको कम्पनीले जानकारी दिएको छ । कम्पनीको यही प्लान्ट भित्र सीजी इलेक्ट्रोनिक्स र सीजी ग्याल्भाको प्लान्ट पनि छ ।
कम्पनीले भारतमा अहिले सिलगुढी, दिल्ली र कोलकत्तामा आफ्नो कार्यालय खोलेको छ भने कम्पनीले खाद्य तथा पेय पदार्थको उत्पादन र वितरण गर्दै आएको छ । चौधरी समूहले भारतमा सीजी फुडको ब्राण्ड मूल्य १० करोड डलर नौ अर्ब नेपाली रुपैयाँ बराबर भएको दावी गरेको छ ।
कम्पनीले भारतको उत्तरपूर्वी भागको चाउचाउ बजारमा आफ्नो ६५ प्रतिशत बजार हिस्सा भएको दावी गर्दै आएको छ । चौधरी समूहले सीजी फुड इन्डिया सिंगापुरको मल्टिनेशनल कम्पनी सिनोभेसन समूहको लगानी र चौधरी समूह नेपालको प्राविधिक सहयोग रहेको दावी गरेको छ । कम्पनीले अघिल्लो आर्थिक वर्षमा भारतमा साढे पाँच अर्ब रुपैयाँभन्दा बढीको आम्दानी गरेको थियो । लक्ष्य हाँसिल गर्नका लागि कम्पनीले सन् २०११ मा तीन वर्ष भित्र पाँच अर्ब रुपैयाँ लगानी गर्ने घोषणा गरेको थियो । डेढ अर्ब रुपैयाँको नयाँ प्लान्ट स्थापना गर्ने तथा तीन अर्ब रुपैयाँ खर्च गरेर स्थानीय उद्योग किन्ने घोषणा कम्पनीले त्यतिवेला गरेको थियो । भारतमा वाईवाईले नेश्लेको म्यागी, निसिन फुडको टप रामेन र ग्लायस्कोस्मिथक्लाइनको फुडलसँग प्रतिश्पर्धा गरिरहेको छ । त्यसबाहेक क्षेत्रीय स्तरका साना कम्पनीसँग पनि वाईवाईको कडा प्रतिश्पर्धा छ ।
चौधरीको भारतमा लगानी
चौधरीले वाईवाईसँगै टाटा समूहको ताज कम्पनीसँग मिलेर होटल पनि सञ्चालन गरिहेको छ । ताजसँग मिलेर सञ्चालन भैरहेको ताज एशिया लिमिटेड(ताल)मा चौधरी समूहको ५० प्रतिशत सेयर हिस्सेदारी छ । तालले श्रीलंका, माल्दिभ्स लगायतका देशमा होटल पाँचतारे होटल र रिसोर्ट सञ्चालन गर्दछ ।
चौधरीले टाटा समूहकै इण्डियन होटलस् कमपनी, कन्जर्भेसन कर्पोरेशन अफ्रिका र चौधरीको सिंगापुरमा भएको कम्पनी सिजेन कर्पोरेशन मिलेर वाइल्डलाइफ पर्यटनमा काम गरिरहेका छन् । यी तीन समूहले तीस करोड भारुका दरले मुख्य वन्यजन्तु संरक्षण भैरहेका तीन क्षेत्रमा १५ भन्दा बढी लज सञ्चालन गरिरहेका छन् । यो कम्पनीले गुजरातमा द गिरी लज र ससान गिरी लज, केरलामा ताज गार्डेन रिट्रिट, दि किक्कडी, राजस्थानमा सवाई मधोपुर लज रान्थामबोर नेशनल पार्क र रामग्रह लज जयपुरमा लज सञ्चालन गरिरहेको छ । विनोद चौधरीको भारत नयाँ दिल्ली लगायतका विभिन्न स्थानमा समेत आलिशान बंगलाहरु छन् ।
