१५ कात्तिक, काठमाडौं । प्रमुख तीन दल शान्ति प्रक्रिया, संविधान निर्माण र सत्ता साझेदारीबारे सहमतिलाई अन्तिम रुप दिन जुटेका छन् । माओवादी अध्यक्ष पुष्पकमल दहाल प्रचण्ड, कांग्रेस सभापति सुशील कोइराला, एमाले अध्यक्ष झलनाथ खनाल र कार्यदलका सदस्यहरुबीच भएको छलफललाई अन्तिम रुप दिन शीर्ष नेताहरुको बैठक अहिले बसिरहेको छ ।
प्रधानमन्त्री निवास बालुवाटारमा जारी बैठकले शीर्ष नेताहरुबीच भएको छलफल तथा सहमतिलाई अन्तिम रुप दिनेछ । दलहरुबीच समायोजन गरिने लडाकूहरुको संख्या र स्वच्छिक अबकासमा जाने लडाकूलाई दिइने राहत प्याकेजबारे पनि लगभग सहमति भएको छ । श्रोतका अनुसार ६ देखि ७ हजार लडाकू समायोजन गर्ने र ६ लाखको पुनःस्थापना प्याजेक बनाउने सहमति भएको छ ।
बैठकपछि कार्यदलका सदस्य एवं कांग्रेस महामन्त्री कृष्णप्रसाद सिटौलाले शान्ति प्रक्रियाका समग्र विषयमा सकारात्मक छलफल भएको भन्दै आजै साँझसम्ममा निष्कर्षमा पुग्ने विश्वास व्यक्त गर्नुभयो ।
शान्ति प्रक्रियाका अन्य विषयमा यसअघि नै सैद्धान्तिक सहमति भइसकेको छ । राज्य पुनःसंरचनाका लागि विज्ञहरुको समूह गठन, सत्यपिनरुपण तथा मेलमिलाप र वेपत्ता खोजविन आयोग गठन, द्वन्द्वकालमा कब्जा सम्पत्ति फिर्ता लगायतका विषयमा पनि दलहरु सहमति नजिक छन् ।
