३ जेठ, काठमाडौं । एकीकृत नेकपा माओवादीले पार्टीका उपाध्यक्ष डा. बाबुराम भट्टराईको हत्या गर्ने योजना बनेको स्वीकार गरेको छ ।माओवादी प्रवक्ता दीनानाथ शर्माले मंगलबार विज्ञप्ती जारी गरी ‘केही अनुशासनहीन, उच्छृङ्खल एवम् अराजक व्यक्तिले पार्टी कार्यालयमा प्रवेश गरी उपाध्यक्ष भट्टराईको हत्या गर्ने योजना बुनिरहेको’ स्वीकार गर्नु भएको छ । यसले पार्टीलाई दुःखित र सतर्क बनाएको भन्दै विज्ञप्तीमा उल्लेख गरिएको छ ।
शर्माले पार्टीभित्र प्रतिक्रियावादी घुसपैठ खतरनाक तहसम्म पुगेको गम्भीर आशंका पैदा भएको बताउनु भएको छ । विज्ञप्तीमा भनिएको छ-’पछिल्लो समयमा बढ्दै गएका अराजक, अनुशासनहीन एवम् उच्छृङ्खल तत्वका गतिविधिले कतै पार्टीभित्र प्रतिक्रियावादी घुसपैठ खतरनाक तहसम्म पुगेको त छैन भन्ने गम्भीर आशंका पैदा गराएको छ ।’
पार्टी उपाध्यक्ष डा. भट्टराईको हत्या गर्ने योजना बनेको स्वीकार गरिएपनि योजना बनाउनेमाथि कारबाही गर्नेबारे केही बताइएको छैन । ‘घटनामा संलग्न व्यक्तिहरूलाई छानविन गरी अनुशासनको दायराभित्र ल्याउनु पार्टीको दायित्व भएको कुरा सम्पूर्ण पार्टीपंक्ति र जनसमुदायमा आश्वस्त तुल्याउनु हामी आफ्नो कर्तव्य ठान्दछौं ।’-विज्ञप्तीमा भनिएको छ । अनुशासनको दायराभित्र ल्याउने भनिएपनि त्यसमा संलग्नहरुमाथि कस्तो कारवाही हुन्छ भन्नेबारेमा प्रवक्ताको बिज्ञप्ति मौन छ ।
कारवाहीबारे कही पनि उल्लेख नहुँदा भट्टराईपक्ष भने आक्रोशित भएको छ । पार्टी संस्थापन पक्षले मजदुरभित्र पसेका गुण्डाहरुलाई संरक्षण गरेको आरोप लगाउँदै भट्टराईपक्षले यसबारे केन्द्रीय कमिटिमा कुरा उठाउने तयारी गरेको छ ।
भट्टराईलाई धम्की दिनले अरुलाई पनि नछोड्ने भन्दै उनीहरुले तत्काल पार्टी हेडक्वाटरले ठोस कदम नचाले तत्काल पार्टी बैठक बोलाएर निर्णय गर्न लगाउने बताएका छन् । ‘हिमालीलाई खानेले पवर्तेलाई पनि खान्छ, मधेसीलाई पनि खान्छन्’ अनलाइनखबरसँग कुरा गर्दै पोलिटव्युरो सदस्य राम कार्कीले भन्नुभयो-’हामी केहि दिन हेडक्वाटरले के गर्छ हेछौं, भएन भने पार्टीको केन्द्रीय वा अन्य निकायको बैठक बोलाएर कारबाहीबारे ठोस निर्णय गर्न लगाउँछौं ।’
पछिल्लो समय पार्टीमा दण्डहिनता र अराजकता बढेको भन्दै कार्कीले त्यसलाई तत्काल अन्त्य गर्न ठोस कदम नचाले पार्टी नै समाप्तीको दिशामा जाने चिन्ता व्यक्त गर्नुभयो ।
केन्द्रीय कार्यालयमा धर्ना
पार्टी उपाध्यक्ष डा. बाबुराम भट्टराईमाथि ज्यान मार्ने धम्की दिनेलाई कारवाहीको माग गर्दै पार्टी सम्वद्ध मजदुरहरुले पार्टी केन्द्रीय कार्यालयमा धर्ना दिएका छन् । स्वस्फूर्तरुपमा विभिन्न होटल, क्यासिनो तथा अन्य श्रम प्रतिष्ठानबाट पेरिसडाँडा पुगेका मजदुरहरुले मंगलबार पार्टी नेताहरुको सुरक्षाको ग्यारेन्टी गर्न र भट्टराईमाथि ज्यान मार्नेमाथि कारवाहीको माग माग गर्दै नारावाजी समेत गरेका छन् । विहान साढे १० बजेबाट सुरु भएको धर्ना एक घण्टासम्म चलेको थियो ।
मजदुरको आवरणमा पार्टीभित्र गुण्डा र अपराधिक समुह प्रवेश गरेको भन्दै उनीहरुले पार्टी नेतृत्वको ध्यानाकर्षण गराएका छन् । ‘मजदुर संगठनमा पहिलेदेखि नै आक्रमण हुँदै आएको थियो’ धर्नामा सहभागी एक मजदुर नेताले भने-’अहिले शीर्ष नेताहरुलाई नै धम्क्याउन थाले । उनीहरुलाई तत्काल कारवाही गरी नेताहरुको सुुरक्षाको ग्यारेन्टी गर्नुपर्छ ।’ मजदुरहरुले मुल गेट अगाडि नारावाजी गरिरहेका बेला जम्मरकट्टेल र बर्तौला लगायतका नेताहरु भने छतमा बसेर हेरिरहनु भएको थियो ।
प्रोपोगाण्डा मात्र होः आरोपित
ज्यान मार्ने धम्की दिएको आरोप लागेका जनक वर्तौलाले भने आफूमाथि लागेको आरोप निराधर भएको बताउनु भएको छ । पार्टी कार्यालयमा विघटित अखिल नेपाल ट्रेड युनियन महासंघका अध्यक्ष शालिकराम जम्मरकट्टलसँगै भेटिएका वर्तौलाले पार्टीका उपाध्यक्ष भट्टराईलाई ज्यान मार्ने धम्की दिने आफ्नो हैसियत नै नभएको बताउनु भयो । उहाँले भन्नुभयो-’उहाँ हाम्रो पार्टीको सम्मानित नेता हुनुहुन्छ । उहाँलाई मारेर मलाई के हुन्छ र ? उहाँलाई मार्ने धम्की दिने मेरो हैसियत पनि छैन ।’ वर्तौलासँगै रहेको जम्मरकट्टेलले पनि वर्तौलाले धम्की दिएको भए उनलाई कारबाही गर्नु भन्दै भट्टराईले मिडियामा प्रोपोगाण्डा मात्र गरेको दावी गर्नुभयो ।
बाबुरामलाई सिध्याउने धम्की दिएका जनक वर्तौला (दाँया) र शालिकराम जम्मरकट्टेल
पार्टी अध्यक्ष प्रचण्ड निकटका शालिकराम जम्मरकट्टेलको सहयोगी जनक वर्तौलाले सोमबार पार्टी कार्यालयको छतमा पसेर केही दिनमै बाबुरामलाई सिध्याउने धम्की दिएका थिए । भट्टराई पक्षका मजदुरमाथि आक्रमणम गरेको आरोपमा अन्नपूर्ण क्यासिनोका एकाइ अध्यक्ष कल्पदीप राईलाई प्रहरीले नियन्त्रणमा लिएको जम्मरकट्टेल आक्रोसित बनेको माओवादी स्रोतले जनाएको छ । उपाध्यक्ष डा भट्टराईले आफूमाथि हुन लागेको साङ्घातिक आक्रमणको सूचना महासचिव रामबहादुर थापा र गृहमन्त्री कृष्णबहादुर महरालाई जानकारी गराइसक्नुभएको छ । धम्कीपछि उपाध्यक्ष डा भट्टराईको सुरक्षाका लागि थप सुरक्षाकर्मीको व्यवस्था गरिएको छ ।
