के तपाई एकीकृत नेकपा माओवादीका उपाध्यक्ष
नारायणकाजी श्रेष्ठ (प्रकाश) लाई भेट्न ललितपुरको हरिसिद्धीस्थित उहाँको
निवासमा जाँदै हुनुहुन्छ ? यदि जाँदै हुनुहुन्छ भने घरमा पस्नुअगावै गेटैमा
लेखिएको ‘बडापत्र’ ध्यानपूर्वक अध्ययन गर्नुपर्ने हुन्छ । सरकारी
कार्यालयको नागरिक बडापत्रजस्तै देखिने ठूलो बोर्डमा ‘स्वागत- अभिवादन’
शीर्षकमा छ बुँदे विवरण उल्लेख गरिएको छ । यी बुँदाहरु पढिसकेर गेटभित्र
छिर्नुभयो भने तपाईले अर्को विचित्र दृश्य देख्न पाउनुहुनेछ ।
उपाध्यक्ष श्रेष्ठको घरमा पूर्व
जानकारीविना समय कटाउनका लागिमात्रै जाने विचार गर्नुभएको छ भने तपाईले
कुनै कष्ट नगर्नुभए हुन्छ । गेटमा टाँगिएको बोर्डको पहिलो बुँदामा नै
स्पष्ट भनिएको छ,’समयको महत्व बुझेर पहिले नै समय निश्चित गरेर समयमै
आउनुभएकोमा धन्यवाद एवं स्वागत छ ।’उपाध्यक्ष श्रेष्ठलाई कुनै भनसुन गराउन,
जागिर माग्न वा गलत काम गराउनका लागि तपाई भेट्न खोज्नुभएको छ भने गेटैबाट
बडापत्र पढेर फर्किनुभए हुन्छ । किनभने ६ बुँदे बडापत्रको अन्त्यमा
लेखिएको छ-’हामीजस्तै अरु कसैको हक हित खोसेर, उसको नोक्सानीको मूल्यमा
आफ्ना निजी स्वार्थका लागि पक्षपातपूर्ण भनसुन गराउन वा कुनै गलत बेठीक काम
गराउन आउनुभएको होइन भन्ने कुरामा म विश्वस्त छु । तपाईको त्यो सदगुणका
लागि साधुवाद र स्वागत छ ।’
गेट छिचोलेर प्रहरीको चेकिङ पार गरेपछि
तपाई भित्र पस्न सफल हुनुभयो भने तपाईले त्यहाँ घरअगाडि फूलबारी र वगैंचा
देख्न सक्नुहुने छ । वगैंचामा फूलसँगै वरिपरिको भित्तामा नेपाली र अंग्रेजी
भाषामा नारै नारा देख्न सक्नुहुनेछ । तर, नारा भन्नाले एमाओवादी जिन्दावाद
वा कुनै पार्टीलाई मूर्दावाद लेखिएको भने विल्कुल होइन । बरु गौतम वुद्ध,
मार्क्स, लेनिन, चेग्वेभारा, दार्शनिक सुकरात, अल्बर्ट आइन्सटाइन र गीताको
महत्वपूर्ण भनाइहरुसमेत भित्तामा कोरिएको पढ्न पाइन्छ ।
वगैचामा कांक्रोसमेत फल्ने तरखरमा छ भने
हरियो दूबो मौलाइरहेको छ । गुलाब र सयपत्री अनि विभिन्न रंगका फूलहरु
फुलिरहेको मनमोहक दृश्य देखिन्छ ।एमाओवादी उपाध्यक्ष श्रेष्ठ केही न केही
नयाँ काम गरेर चर्चामा आइरहनुहुन्छ । संविधानसभा विघटन हुने दिन उहाँ
बालुवाटारमा आँखाबाट आँशु नै निकालेर उहाँ रुनुभएको थियो ।
परराष्ट्रमन्त्री छँदा उहाँले कुटनीतिक भेटघाटलाई व्यवस्थित गर्ने प्रयास
गर्नुभयो । तर, त्यसमा त्यति सफल हुन सक्नुभएन ।मन्त्रीबाट हटिसकेपछि पनि
उहाँले केही न केही नयाँ पारा झिकेर दिनचर्या बिताइरहनुभएको उहाँको निवास
वरिपरिको दृश्यले स्पष्ट पार्छ । पहिले ललितपुर झम्सीखेलको एउटा साँघुरो
घरमा बस्ने नारायणकाजी अहिले हरिसिद्धिको फराकिलो घरमा सर्नुभएको छ । तर,
यो घर उहाँको निजी नभएर भाडामा लिइएको हो ।
तपाईहरुलाई लाग्दो हो अविवाहित एवं
ब्रह्मचारी जोगीजस्ता श्रेष्ठ घरमा एक्लै हुनुपर्ने हो । तर, उहिलेका काजी
साहेबका घरमाजस्तै उहाँको घरमा पनि रेखदेख गर्ने र भेटघाट गर्नेहरुको
घुईंचो नै लाग्ने गर्दछ । पूर्वउपप्रधानमन्त्रीसमेत हुनुभएकाले गेटमा
बन्दूकधारी सुरक्षाकर्मी पनि हुने नै भए । पार्टीको जिम्मेवार नेता भएकाले
भेट्न आउनेहरुको दिनभरि नै चलह-पहल भइरहन्छ ।तर अरु नेताको भन्दा
नारायणकाजीको निवास अलि फरक बनाएको छ यी आदर्शवादी नारा र उद्गारले । यो वा
त्यो काम लिएर पुग्ने, अनावश्यक दबाब र प्रभाव पार्न खोज्ने आगन्तुकहरुबाट
हैरान भएर होला उहाँले त्यस्ता मान्छेका लागि गेटैमा सजक गराउनुभएको ।
‘भित्तामा किन यसरी विभिन्न विद्वानका
भनाइ लेखाउनुभएको ?’ अनलाइनखबरको प्रश्नमा उपाध्यक्ष श्रेष्ठले भन्नुभयो-
‘घरमा आउने पाहुनाहरुले एकैछिन अल्मलिनुपर्दा अनावश्यक कुरा सोच्नुको साटो
एकैछिन भए पनि राम्रा विचारहरु पढुन् र उनीहरुमा सदविचार आओस् भनेर यसो
गरिएको हो ।अनलाइनखबरको टोली विदा भएर घरबाट फर्किने बेलामा उपाध्यक्ष
श्रेष्ठले गेटको बोर्डमा लेखिएको अन्तिम बुँदा देखाउँदै सो बुँदा पढिदिन
विशेष आग्रह गर्नुभयो ।
