४ माघ, काठमाडौँ । नेपाल आयल निगमले सर्वसाधारण उपभोक्ताको ढाडै सेकिने गरी पेट्रोलियम पदार्थको मूल्यमा भारी मात्रामा वृद्धि गरेको छ । निगम सञ्चालक समितिको बुधबारको बैठकले पेट्रोल, डिजेल, मट्टितेल, हवाई इन्धन र खाना पकाउने ग्याँको मूल्य वृद्धि गर्ने निर्णय गरेको हो । निगम प्रवक्ता मुकुन्द ढुंगेलले पेट्रोलमा प्रतिलिटर १०, डिलेज र मट्टितेलमा प्रतिलिटर ९/९, आन्तरिक हवाई इन्धनमा प्रतिलिटर ५ र खाना पकाउने ग्याँसको मूल्यमा प्रति सिलिण्डर १ सय ७५ रुपैयाँका दरले वृद्धि गरिएको अनलाइनखबरलाई जानकारी दिनुभयो ।
यो सँगै अब पेट्रोलको खुद्रा मूल्य प्रतिलिटर १ सय १५, डिजेलको ९०, मट्टितेलको ८५ र खाना पकाउने ग्याँसको मूल्य १५ सय तथा हवाई इन्धनको मूल्य प्रतिलिटर १ सय ५ रुपैयाँ पुगेको छ । यसअघि पेट्रोलको मूल्य प्रतिलिटर १ सय ५, डिजेल र मट्टतिेलको मूल्य ७६ तथा आन्तरिक हवाई इन्धनको मूल्य प्रतिलिटर १ सय तथा ग्याँसको मूल्य १ हजार ३ सय २५ रुपैयाँ थियो । निगमले नयाा मूल्य बुधबारदेखि नै लागू हुने जनाएको छ ।
प्रवक्ता ढुंगेलले महंगोमा किनेर सस्तोमा बिक्री गर्दा निगम घाटामा गएको भन्दै घाटा कम गरेर बजारमा हाल विद्यमान अभाव अन्त्यका लागि अन्तिम विकल्पका रुपमा मुल्य समायोजन गरिएको दाबी गर्नुभयो । मूल्य वृद्धि गर्दासमेत निगमको मासिक घाटा ८६ करोड रुपयाँ भन्दा बढी हुने ढुंगेलको भनाइ थियो । इन्धनमा भएको मूल्य वृद्धिसागै ढुवानी भाडा बढ्न गई दैनिक उपभोग्यसहति अन्य अत्यावश्यक सामानको बजार मूल्य आकासिने निश्चित छ ।
आयल निगम धारासायी भएको भन्दै प्रधानमन्त्री डा. बाबुराम भट्टराईले सोमबार राष्ट्रिय योजना आयोग, नेपाल आयल निगम तथा आर्थिक सल्लाहकार परिषद्लगायत सरोकारवाला निकायका पदाधिकारीसँगको सामूहिक छलफलका क्रममा निगमलाई जोगाउन तत्काल मूल्य वृद्धि गर्न निर्देशन दिनुभएको थियो ।
