आइतबार एउटा नदेखिनु पर्ने दृश्य देखियो काठमाडौँमा। सशस्त्र प्रहरीका एक डीआइजी रञ्जन कोइरालालाई नियन्त्रणमा लिएर अरु प्रहरीले अदालत लाँदै थिए। अदालतले हिरासतमा राखी अनुसन्धान गर्न म्याद थपेपछि अहिले उनी नेपाल प्रहरीको थुनामा छन्। उनीमाथि लागेको अभियोग चानचुने हैन, आफ्नै स्वास्नीलाई मारेको, त्यो पनि विभत्स तरिकाले!
अपराधका खबरहरु त्यसै पनि मन हल्लाउने खालका हुन्छन्, त्यसमाथि यो सुन्दै डरलाग्दो खालको छ। देश र जनताको रक्षा गर्ने कसम खाएको सशस्त्र प्रहरीका उच्च अधिकारी कर्तव्यनिष्ठ र अनुशासनको नमूना बन्नु पर्थ्यो, तर आफ्नै जीवन संगिनीको हत्याको धब्बा लागेको छ उनीमाथि। अनुसन्धानरत प्रहरीका अनुसार उनले आफ्नो दोष सकारिसकेका छन्। उनी विचलित पनि देखिए। हत्याको कारण अरु केही नभएर पारिवारिक विवाद मात्र रहेछ। विवाद चरम सीमामा पुग्दा रिसलाई नियन्त्रण गर्न नसकेपछि यो आङ्गै सिरिङ पार्ने हत्या भएको रहेछ।
७० प्रतिशत शरीर जलेको अवस्थामा रहेछ गीता ढकालको शव। अर्थात् चिन्नै नसकिने। पुस २८ गते कै बिहान मकवानपुर, पालुङको नेत्राङमा भेटिएको रहेछ शव। कसको लाश, कसले जलाएर फालेको केही थाहा भएन त्यतिबेला। नाडीमा रहेको लेडिज घडीका कारण केटीको हो भन्ने अनुमान मात्रै गरिएछ।
तर हेर्नुस् त, पाप त धुरीबाट कराउँदो रहेछ नि। कोइरालालाई त्यही भएर तान्यो त्यही ठाउँले। लाश जलाएकै ठाउँमा उनी शनिबार फेरि पुगेछन्। विचलित मुद्रामा के के हर्कत गरेछन्। शायद् त्यति ठूलो पाप गरिसकेपछि पोलेको पनि हुनसक्छ। आफ्नै गाँउमा लाश पोलेर जाँदा नि थाहा नपाएको भन्दै स्थानीय बासिन्दाहरु चनाखो भएका रहेछन्। यही क्रममा नौलो मान्छेको शंकास्पद गतिविधि देखेर उनीहरुले सोधपूछ गरेछन् र कोइरालालाई समातेर स्थानीय प्रहरीलाई बुझाएछन्।
सशस्त्र प्रहरीको डीआइजी भनेर थाहा पाएपछि र काठमाडौँबाट फोन आएपछि उनलाई त्यहाँको प्रहरीले छोडी पनि दिएछ। धन्न बेलैमा प्रहरीले चाल पायो र काठमाडौँ भित्रिँदै गर्दा नागढुङ्गाबाट गिरफ्तार गर्यो। बयानमा उनले पुस २७ गते नै झगडा भएपछि रिसले घाँटी थिच्दा मृत्यु भएको बताएछन्।
२०५० सालमा बिहे भएको थियो उनको। आठ वर्षपछि झगडा हुन थालेको रहेछ। २०६२ सालमै छुट्टिएर बस्न थालेको थियो दम्पति। गएको मंसिरमा मानाचामल मुद्दा (छुट्टिएर बस्ने, लोग्नेले निश्चित रकम भरणपोषणका लागि दिनुपर्ने) हालेका थिए। त्यसको एक महिनामा नै हत्या भयो। लोग्नेस्वास्नीको झगडा, परालको आगो हुनुपर्नेमा भुसको आगो भएर भित्रभित्रै सल्कँदै रहेछ जसले यो विस्फोटको रुप लियो। डीआइजी कोइराला बारे पत्रपत्रिकामा पनि खबर छापिन थालिसकेको थियो। जनआस्थाले अस्ति भर्खर कान्छी च्याप्ने डिआइजी हायलकायल शीर्षकमा समाचार छापेको थियो (हेर्नुस्) समाचारमा उनको चरित्रबारे लेखिएको छ। कोइरालाले भने आफ्नी पत्नीको चरित्र बिग्रेको आरोप लगाउने गर्थे।
क्षणिक रिसको सही व्यवस्थापन गर्न नसक्दा यति ठूलो घटना भयो। जीवन साथीको रुपमा सँगै बाँच्ने कसम खाएकाहरुबीच मतभेद भएपछि सीधा हिसाबले छुट्टिनु उचित हुन्थ्यो। कसैले कसैको जीवनमा हस्तक्षेप गर्न जरुरी थिएन। तर जबर्जस्ती सम्बन्ध अघि बढाइयो। रिसमाथि रिस र घृणामाथि घृणा थपियो। घृणाको स्तर यति धेरै बढ्यो कि त्यसले बुद्धि र विवेक शून्य बनाइदियो। र त, हत्या जस्तो कठोर जघन्य काम हुनपुग्यो।
हेर अब दुई सन्तानको बिजोग! आमालाई बाउले मार्यो। अनि बाउ अब जेलमा बस्नुपर्नेछ कति धेरै वर्ष !
