१ माघ, काठमाडौँ । नेपाली सेनाले शनिबार नेपालको साढे चार घण्टे औपचारिक भ्रमणमा आएका चीनका प्रधानमन्त्री वेन जियाबाओको सुरक्षामा आफ्नो २५ सय फौज परिचालन गरेको जनाएको छ ।
सैनिक जनसम्पर्क निर्देशनालयले गएराति एक विज्ञप्ति जारी गर्दै सो जानकारी गराएको हो । ‘जियाबाओको सुरक्षार्थ नेपाली सैनिक हवाई महानिर्देशनालय, डीएम आई, मेडिकल, बम डिस्पोजल, डग युनिट तथा अन्य विशेष सुरक्षा फौज गरी करिब २५०० फौज परिचालन भएको व्यहोरा जानकारी गराउँदछौँ ।’ निर्देशनालयद्वारा जारी विज्ञप्तिमा भनिएको छ । सरकारले जियाबोओको सुरक्षाका लागि तीन घेराको विशेष सुरक्षा व्यवस्था मिलाएको थियो ।
जसमध्ये पहिलो घेराको जिम्मा सेनालाई दिइएको थियो भने दोस्रो र तेस्रोमा सशस्त्र र नेपाल प्रहरी परिचालन गरिएको थियो । सुरक्षाको कारण देखाउँदै जियाबाओको सवारी हुने समयमा राजधानीका सडकमा सार्वजनिक यातायात सञ्चालनमा रोक लगाउनुका साथै पैदल यात्रुलाई समेत हिँडडुल गर्न दिइएको थिएन । नेपालमा करिब साढे ४ घण्टा बिताएर जियाबाओ हिजै कतारको राजधानी दोहा पुगेका छन् ।
