काठमाडौं । एक सोंच जसले दुनियाँ बदलदिन्छ, हो, नेपाली युवाको समूहले त्यस्तै एउटा सोंच(क्यासअनएड)को विकास गरेको छ, जसले विश्वको विज्ञापन बजारलाई बदलदिने तागत राख्छ ।
हिजो हाम्रो विज्ञापनको सोंच पूर्वबाट थियो, आज हामीले सोंच होइन प्रविधि पश्चिमलाई दिंदै छौं, क्यासअनएडको पत्रकार सम्मेलनमा प्रिज्म एडर्भटाइजिङका प्रमुख कार्यकारी अधिकृत रञ्जित आचार्यले भने, त्यही सोंचलाई समर्थन गर्न आज यहाँ आएको हुँ ।
यो सोंच कति ठूलो हो प्रमाणित गर्न म एउटा उदाहरण तपाईंलाई सुनाउँछु, आचार्यले भने, केही दिन अघि भएको ब्राण्ड समिटमा जे वाल्टर थम्सन भारतका सिनियर भाइस प्रेसिडेण्ट मोहित हिरा नेपाल आएका थिए, उनलाई क्यासअनएडले कसरी काम गर्छ भनेर हामीले देखायौं, उनी बसिरहेको स्थानबाट जुरुक्क उठे, स्यालुट गरे र हामीहरुलाई अँगालोमा कस्दै भने, गजबको आइडिया ।
ड्यासमा बसेको क्यासअनएडको टीमलाई देखाउँदै उनले थपे, यी नेपाली युवाको एउटा सोंच, त्यो सोंचलाई प्रविधिमा ढालिएको क्यासअनएड देखेपछि मलेसियाको मिडिया बाइङ्ग कम्पनीका मालिकले सोधे, हामी मलेसियामा तपाईंसँग काम गर्न इच्छुक छौं, के तपाई हामीलाई त्यो अवसर दिनुहुन्छ ?
यो सोंचको यति धेरै हल्लाखल्ला भएको छ, आगामी केही महिना भित्र यो सेवा भारत, बंगलादेश, श्रीलंका, मलेसिया, फिलिपिन्स, इन्डोनेशिया, ब्राजिल, कम्बोडिया, अमेरिका, सिंगापुर, र संयुक्त अरब इमिरेट्स लगायतका १८ मुलुकमा पनि सुरु हुँदैछ ।
लामो समयदेखिको सोंचलाई क्यासअनएडका रुपमा एक महिना अघि प्रविधिमा ढालिएको थियो, त्यसको प्रारम्भिक परीक्षण सुरु गरियो, सुरुमा यो प्रविधि सय÷दुई सय मोवाइलमा हेरौं भन्ने थियो, तर यो प्रविधि यसरी एक कान दुई कान भयो, एक महिनामा हेर्दा हेर्दै गुगल प्लेस्टोरबाट दश हजार पटक डाउनलोड भयो ।
मिडिया हाउसहरुवीच क्यासअनएडको समाचार कसले ब्रेक गर्ने प्रतिश्पर्धा सुरु भयो, समाचार ब्रेक भएपछि क्यासअनएड ट्विटर, फेसबुकमा भाइरल हुन थाल्यो, डाउनलोड ह्वात्तै बढ्यो, कल इम्प्रेसन सुस्ताए र बुम भएको अर्थतन्त्रको चित्र रेखा झैं माथि चढ्न थाल्यो, क्यासअनएडका एउटा सोंचकर्ता विश्वास ढकालले रेखाचित्र देखाउँदै भने ।
पत्रकार सम्मेलनमा कम्पनीका प्रमुख कार्यकारी अधिकृत सजत श्रेष्ठले भने, सन् २०१३ को अन्तिमसम्म दुई लाख नेपालीको एन्ड्रोइड फोनमा क्यासअनएडको एप्स डाउनलोड हुने अपेक्षा गरेका छौं, एप्सबाट दैनिक ४० लाख कल इम्प्रेसन हुनेछ, किनभने सरदर एउटा फोनमा दैनिक २० कल हुन्छ । अर्थात एप्स डाउनलोड गरेपछि दैनिक २० कल रिसिभ गरे, महिनामा न्यनुत्तम पनि छ सय रुपैयाँको आम्दानी हुनेछ, नेपालमा औषत एउटा उपभोक्ताले मासिक साढे तीन सयदेखि चार सय रुपैयाँको बीचमा टेलिफोनको बिल उठाउँछ ।
सोंच्नुहोस्, तपाईं टेलिफोनमा औषत रकमको वरिपरि खर्च गर्नुहुन्छ र क्यासअनएडबाट औषत आम्दानी गर्नुहुन्छ भने पनि तपाईको मोवाइलको बिल क्यासएण्डएडले नै तिरिदिन्छ, अझ कञ्जुस गर्नुहुन्छ भने त बचत पनि हुन्छ । त्यसरी पैसा बचत भए पनि चिन्ता छैन्, यही सोंचका अर्का साझेदार इसेवाका प्रमुख कार्यकारी अधिकृत असगर अलीले भने, मोवाइलमा भएको आम्दानी इसेवा अकाउण्टमा सार्नुहोस्, त्यसपछि के गर्ने, फिल्मको टिकट किन्ने ? धारा, पानी, बिजुली लगायत युटिलिटीको बिल भुक्तानी गर्ने ?, बैंक खातामा सार्ने, भाटभटेनीमा गएर सपिङ गर्ने ? के गर्ने ? सोंच्नुहोस् मात्र त्यो सबै इसेवाले पूरा गर्छ ।
सिईओ श्रेष्ठले भने, हामी दश वर्ष अघि मोवाइलमा इनकमिङका लागि पैसा दिन्थ्यौं, पछि इनकमिङ फ्रि भयो, अब हामीले, नेपालले, तपाईंलाई, विश्वलाई नयाँ सोंच र प्रविधि दिंदैछौं, जहाँ तपाईं फोन रिसिभ गर्दा पैसा पनि आम्दानी गर्नुहुन्छ, यो पुरै सोंचको सबैभन्दा ठूलो व्युटी नै यही हो । अर्को यसको सुन्दरता भनेको यो, विश्वमा सबैभन्दा पहिले हामीले बनाएको हो, यसको प्याटेन्ट समेत हामीले दर्ता गरिसकेका छौं, श्रेष्ठले भने ।
फोनको घण्टी बजेपछि सबैको पहिलो ध्यान मोवाइलको स्क्रिनमा हुन्छ, तपाई कसले फोन गर्यो भनेर हेर्दै गर्दा छ सेकेण्डको एउटा विज्ञापन पनि हेर्नुहुन्छ, तपाईंले फोन रिसिभ गरे मात्रै पनि कम्तिमा पनि एक रुपैयाँको ग्यारेन्टी हामीले गरेका छौं, श्रेष्ठले भने । आफ्ना मोवाइलमा क्यासअनएड हाल्न र आफूले गरेको आम्दानीलाई नगदमा बदल्न चार सरल तरिका छन् ।
१. यो सेवा लिनका लागि एन्ड्रोइड सिस्टम भएको मोवाइल फोन चाहिन्छ, यो फोनबाट गुगल प्ले स्टोरमा गएर क्यासअनएड एप्स डाउनलोड गर्नुपर्दछ ।
२. एप्स डाउनलोड गरेपछि रजिष्टे«शन गर्नुपर्दछ, रजिष्ट्रेशन सोधिएका प्रश्न भरेर आफै गर्न पनि सकिन्छ भने फेसबुक लग इन गरेर पनि क्यासएण्डएडमा आफूलाई रजिष्ट्रेशन गर्न सकिन्छ ।
३. रजिष्ट्रेशन भैसकेपछि फोनमा विज्ञापन देखिन थाल्छ, पैसा आम्दानी गर्नका लागि यो विज्ञापन कम्तिमा पनि छ सेकेण्ड हुर्नुपर्दछ । एक विज्ञापन वापत एक अमेरिकी सेन्ट खातामा थपिंदै जान्छ, जुन रकम तत्कालै हेर्न सकिन्छ ।
४. यसरी क्यासएण्डएडमा जम्मा भएको रकम नेपालमा इ–सेवामा ट्रान्सफर गर्न सकिन्छ, विदेशमा भने पेपल खातामा रकम ट्रान्सफर गर्न सकिन्छ । रकम ट्रान्सफर गर्नका लागि एप्समै बटनको व्यवस्था छ । इसेवामा प्राप्त रकम मोवाइल टपअप गर्न, विद्युत, खानेपानी, टेलिफोन लगायत युटिलिटीको महसुल तिर्न, सिनेमाको टिकट खरिद गर्न, बस, विमानको टिकट किन्न तथा इसेवाले प्रदान गर्ने अन्य सेवाहरुमा उपयोग गर्न सकिन्छ ।
क्यासअनएडले विज्ञापन बजारमा ठूलो क्रान्ति त ल्याउँछ, तर तत्कालै प्रिन्ट र टेलिभिजन विज्ञापनलाई भने असर गर्दैन्, प्रिज्मका सिईओ आचार्यले भने । मोवाइलमा छ सेकेन्ड बजाएको विज्ञापन रिमाइन्डर हो । दोस्रो यसले लक्षित समूहसम्म विज्ञापन पठाउन सक्छ, जुन न्युन खर्चमा पूरा गर्न सकिन्छ ।
आचार्यले उदाहरण दिंदै भने, होटल र्याडिशनले न्यु इअर इभमा कार्यक्रम गर्दैछ, त्यसको विज्ञापन गर्नुछ भने अहिलेलाई टेलिभिजनमा बजाउँदा देश विदेश पुग्छ, पेपरमा छाप्दा काठमाडौंमा मात्र होइन उपत्यका बाहिर पनि पुग्छ, त्यसको पनि खर्च विज्ञापनदाताले उठाउनुपर्दछ, अब यो एप्सबाट काठमाडौं उपत्यकाका पोष्टपेड मोवाइल बोक्ने दश हजार ग्राहकलाई मात्रै कम्पनीले क्यासअनएड मार्फत विज्ञापन दिन सक्छ, अहिलेकै हिसावमा भन्ने हो भने पनि यो २०–२५ हजारको खर्चमा हुन्छ ।
यसले सानो बजेट भएको विज्ञापनदाता पनि बजारमा आउँछ, त्यसले विज्ञापन बजारलाई विस्तार गर्न, व्यापारलाई बढाउन पनि मद्दत पुग्छ, उनले भने । नयाँ एप्सले एजेन्सिलाई सिर्जनशिल बनाउने, छ सेकेन्डमा सन्देश पुर्याउनुपर्ने हुँदा एनिमेशन लगायतका क्षेत्रमा नयाँ रोजगारी सिर्जना हुने समेत आचार्यले बताए ।
अहिलेका लागि भने यो एप्स एन्ड्रोइड प्लेटफर्ममा मात्र छ, त्यसो भए आईओएस र विन्डोजको प्लेटफर्ममा कहिले आउँछ यो एप्स ? गुगलको प्लेस्टोरभन्दा आईओएसको एप्सस्टोर अलि बढी जटिल छ, सम्भवत हामी १८/२० देश पुगेर एप्सको महत्व स्थापित गर्यौं भने प्लेस्टोरले पनि आफ्नो एप्स स्टोरको प्राविधिक जटिलतालाई सम्वोधन गर्ला ? अहिलेका लागि भने त्यसैको प्रतिक्षा छ, कम्पनीका चिफ टेक्नोलोजी अफिसर राजेश शर्माले भने ।
