३० असोज, काठमाडौं । हिन्दुहरुको महान्
चाड बडादशैं आजदेखि सुरु भएको छ । यो पर्व १५ दिनसम्म अर्थात् आश्विन शुक्ल
प्रतिपदादेखि पूणिर्मासम्म परम्परानुसार दुर्गा भवानीको पूजा-आराधना गरी
हर्षोल्लासका साथ मनाइँदैछ ।
बडादशैंको पहिलो दिन आज बिहान आ-आफ्ना
घरको पूजाकोठा तथा दशैंघरमा विधिपूर्वक दियो, कलश र गणेशको पूजासहित माटोको
पूर्ण घडामा गाईको गोबर टाँसी जौ र मकै रोपेर घटस्थापना गरिँदैछ ।
आज ११ :०७ बजे बिहान घटस्थापना, कात्तिक ८
गते बुधवार विजयादशमीका दिन बिहान १०:३५ बजे देवी विसर्जन र बिहान ११:२९
बजे टीका लगाउनका लागि शुभ साइत रहेको नेपाल पञ्चाङ्ग निर्णायक समितिका
अध्यक्ष डा माधव भट्टराईले जानकारी दिनुभयो ।
यसैगरी कात्तिक ५ बुधवार फूलपातीका दिन
बिहान ०९:११ बजे तुलजाभवानीको यात्रा तथा ०९:५१ बजे थिराशनका लागि साइत र
कात्तिक ८ गते बुधवार विजयादशमीका दिन ११:४३ बजे तुलजाभवानीको यात्रा तथा
१२:३९ बजे थिराशनका लागि साइत जुरेको छ ।
विजयादशमीका दिन आफ्ना मान्यजनबाट टीका
ग्रहण गर्दा अरू फूलको सट्टा समृद्धिको प्रतिक पहँेलो जमरा नै प्रयोग गरिने
हुनाले जमरा उमार्न शुद्ध माटो तथा बालुवा प्रयोग गरिन्छ ।
यसरी जमरा राख्दा घटस्थापनाको अघिल्लो दिन नै आ-आफ्ना घरआँगनलाई लिपपोत गरी सिँगारेर सफासुग्घर राखिन्छ ।
असत्यमाथि सत्य र आसूरी शक्तिमाथि दैवी
शक्तिको विजयका रूपमा मनाइने यस पर्वअन्तर्गत नवरात्रिका उपलक्ष्यमा आजदेखि
नौदिनसम्म विभिन्न शक्तिपीठ तथा दसैँघरमा प्रत्येक दिन पूजाअर्चनासहित
दुर्गा सप्तशती चण्डी र भगवतीको स्तोत्र पाठ गर्ने गरिन्छ ।
बडादशैँको सातौँ दिन कात्तिक ५ गते आइतबार
मलुकभर धार्मिक परम्पराअनुसार फूलपाती भित्र्याइने, महाअष्टमी र महानवमीका
दिन दसैँघर र कोतलगायत विभिन्न शक्तिपीठमा बलिसहित विशेष पूजा गरिने,
विजयादशमीका दिन नौदिनसम्म दशैँघरमा दुर्गा भवानीको पूजाआराधना गरी राखिएको
जमरासहितको टीका लगाउने र कोजाग्रत पूणिर्माका दिन घटस्थापनाका दिन
राखिएको जमरा विसर्जन गरी साँझ महालक्ष्मीको पूजा आराधना गरिने प्रचलन छ ।
परम्पराअनुसार घटस्थापनाका उपलक्ष्यमा
काठमाडौँको हनुमानढोका दरबारमा रहेको दशैँघरमा वैदिक विधिपूर्वक जमरा राखी
महाकाली, महालक्ष्मी, महासरस्वतीलगायत नवदुर्गा र अन्य शक्तिपीठहरूमा
नवरात्रि पूजा आरम्भ गरिन्छ ।
विभिन्न कारणवश आफ्नो मूलघरबाट टाढा रहेका
परिवारका सदस्यहरू सपरिवार बसेर दशैँ मनाउन घर र्फकने क्रम सुरु भइसकेको छ
। घर जान र घर र्फकनाका लागि राजधानीमा मानिसहरूको आउने र त्यहाँबाट बाहिर
जाने क्रम बढिरहेको छ ।
