१३ पुस, काठमाडौं । पदमा नभएको बेला पनि
उत्तिकै चुरीफुरी र फुर्तिफार्ती देखाउने जेपी गुप्ता र खुमबहादुर खड्काको
यो रवाफ जेलमा पनि उस्तै छ । भ्रष्टाचारको अभियोगमा छुट्टाछुट्टै रुपमा
डिल्लीबजार सदरखोर पुगेका उनीहरु सँगसँगै जस्तो बस्छन् । त्यहाँको दिनचर्या
र चहलपहल देख्दा लाग्छ, उनीहरु जेलमा नभएर आफ्नै आलिशन बंगलामा छन् ।
टेलिभिजनदेखि हिटरसम्म
झण्डै डेढसय कैदीको क्षमता रहेको
डिल्लीबजार कारागारमा अहिले झण्डै सातसय कैदीबन्दी छन् । देशका अन्यत्र
जेलमा जस्तै त्यहाँ रहेका कैदीहरुलाई पनि उस्तै साँघुरो र सास्ती छ । हुन त
जेल, घरजस्तो हुने कुरा भएन । तर अरुले घरमा जस्तो सुविधा नपाएपनि गुप्ता र
खड्काले भने जेलमा समेत ससुरालीमा भन्दा बढी मेजमानी पाएका छन् ।
पूर्वमन्त्री र चर्चित नेता भएकाले होला
उनीहरुलाई सुविधा सम्पन्न छुट्टै कोठाको व्यवस्था गरिएको छ । चाहिएको
सरसामान लगिदिन र भेट्ने मान्छे आएका छन् भनेर खबर गरिदिन सहयोगी छन् ।
कोठामा जाडोको बेला जिउ तताउने हिटर समेत छ । दुवैजनाको कोठामो ठूला
टेलिभिजन सेट राखिएको छ । बाहिर हिँडडूल गर्न बाहेक अरु सबै सुविधा
उनीहरुलाई छ ।
मीठा परिकारको बन्दोबस्त
जेलमा कैदी बन्दीका लागि सरकारले नै
सिदाको व्यवस्था गरिदिन्छ । अर्थात सरकारी भाततिउन नै खान पाइन्छ । तर
गुप्ता र खड्काले जेलमा पाउने खानेकुरा खाँदैनन् । उनीहरुलाई होटलबाटै
प्याकिङ खानेकुरा आउँछ । घर परिवारले पनि बेलाबेला मीठामीठा परिकार लगिदिने
गर्छन् । भेट्न जानेहरुले त अस्पतालमा बिरामीलाई लगेजस्तो मनपर्ने फलफूल र
अरु खानेकुरा लगिहाल्छन् ।
भेट्नेहरुको ओइरो
पहिले निवास र पार्टी कार्यालयमा
रहँदाजस्तै जेलमा पनि गुप्ता र खड्कालाई भेट्न जानेहरुको दिनहुँ ओइरो लाग्छ
। हरेकदिन उनीहरुलाई भेट्न ५० भन्दा बढीको ओहोरदोहोर हुने जेल प्रशासनले
जनाएको छ । खड्का र गुप्तालाई भेट्न बिभिन्न दलका शीर्ष नेता, बहालवाला
मन्त्री, सुरक्षा अधिकृत, आफन्त, परिवार र साथीभाइको जेलमा चहलपहल देखिन्छ ।
भेट्नलाई छुट्टै कक्ष
जेलभित्र रहेका गुप्ता र खड्कालाई अरुसँग
भेट गर्नको लागि जेल प्रशासनले छुट्टै कक्षको व्यवस्था गरेको छ । जेलको
प्रवेशद्वार नजिकै रहेको कोठामा पनि सुविधासम्पन्न भौतिक सामग्रीको
व्यवस्था गरिएको छ । बस्नको लागि आरामदायी सोफा र कुर्सीको व्यवस्था छ ।
त्यो कोठामा अरु कैदी बन्दी जान पाउँदैनन् । गुप्ता र खड्का बस्ने कक्षमा
जस्तै भेटघाटको लागि बनाइएको कोठामा पनि सहयोगीको व्यवस्था छ ।
दिउँसो भेटघाटमा व्यस्त हुने दुवै
‘भ्रष्टाचारी’ नेता बिहान सबेरै उठ्छन् । दैनिक कर्मपछि गुप्ता लेखपढमा
व्यस्त हुन्छन् । तर खड्का भने टेलिभिजन हेरेर समय बिताउँछन् ।
