- सरल शर्मा
नेताका छोराछोरीलाई निजीबाट सरकारी शिक्षण संस्थामा पढाउने अभियानलाई सफल पार्न भन्दै अखिल क्रान्तिकारीका अध्यक्ष हिमाल शर्माले दुई हप्ता अघि छोरा सरललाई चीनबाट फिर्ता बोलाउनुभयो ।सरकारी छात्रवृत्तिमा एमबीबीएस पढ्न पठाएको छोरा बोलाएको भन्दै उहाँको आलोचना भयो । पछि पार्टीले फेरि सरललाई चीन फिर्ता पठाउने निर्णय गर्यो । यो निर्णयसँगै ‘हिमालले नाटक गरेको रहेछ’ भनेर आलोचना पनि भैरहेको छ । तर सरल भने र्फकन पाएकोमा निकै खुशी छन् । बिहीबार चीन जानुअघि आफ्नो दुई हप्ताको नेपाल बसाईका अनुभवबारे अनलाईन खबरले सरलसँग छोटो कुराकानी गरेको छ । ममी त म नआओस् भन्ने चाहानुहुन्थ्यो । तर बुबाले कर गरेपछि केही लागेन । उहाँको आग्रह अस्वीकार गर्न नसकेर म दुई हप्ताअघि चीनबाट फर्किएँ ।
आउने बित्तिकै बुबासँग खटपट पर्यो । मलाई बोलाएको भनेर ममी पनि बुबासँग असन्तुष्ट हुनुभयो । बुबाले तिमी फर्केपछि अब मेरो अभियान पूरा हुन्छ, तिम्रो ईतिहास बन्छ भनेर आश्वस्त पार्न खोज्नुभयो । तर मलाई पत्यार थिएन । आएको भोलिपल्ट मेरोबारेमा सञ्चार माध्यममा खबर प्रसारण तथा प्रकाशन भएको देख्दा मलाई अचम्म लाग्यो । म फर्केको कुरा यति धेरै चर्चामा आउँछ भनेर मैले सपनामा पनि सोचेको थिईन । म फर्केकोमा कतिले बधाई दिए । कतिले र्फकनुहुन्न थियो भने । सञ्चारमाध्यम र आफन्तहरुले सरललाई अन्याय भयो, मानवअधिकारको हनन भयो भन्ने कुरा गरे । दुईथरी कुरा आउँदा म झन् मानसिक तनावमा परें ।
मेरो पढाई यत्तिकैमा खतम हुने भयो भनेर म निराश भएँ । अब पढ्छु भन्ने सोचाई दिमागबाट हराईसकेको थियो । यसबीचमा मलाई कुनै पार्टी नेताहरुले भेट्न पनि खोजेनन्, फोन पनि गरेनन् । मलाई सञ्चारमाध्यमले धेरै सहयोग गरे । सञ्चार माध्यम मार्फत नै मैले आफूलाई लागेको कुरा बताएँ । मलाई अन्याय भएको कुरा मैले मात्र होईन, मानवअधिकारवादी र समाजका अरु क्षेत्रका व्यक्तिहरुले पनि भने । यही दबाबले होला मंगलबार मलाई प्रचण्डले बोलाउनुभयो । उहाँले मैले तिम्रो सबै कुरा बुझें । अन्याय भयो भनेर मलाई कुटनीतिज्ञ र मानवअधिकारर्मीहरुले पनि भने । अब फिर्ता जाने मानसिकता बनाउनु, म पार्टीमा छलफल गर्छु भनेर प्रचण्डले भन्नुभयो । मैले नसोचेको कुरा भयो । म खुशी भएँ ।
तर, म फिर्ता हुँदा बुबाको अभियान तुहिन्छ की भनेर प्रश्न गर्दा प्रचण्डले ‘त्यस्तो हुँदैन, तिमी सरकारी छात्रवृत्तिमा गएको मान्छे, क्रान्तिकारीको अभियानलाई साथ दिने गरी पार्टी केन्द्रीय समिति बैठकबाट आवश्यक निर्णय गर्छु’ भन्नुभयो । नेताका छोराछोरी सरकारी शिक्षण संस्थामा पढाउने अभियान कमजोर हुँदैन भनेर उहाँले विश्वास दिलाउनुभयो । त्यसपछि त्यही दिन प्रचण्डले अरु पदाधिकारीसँगै बुबालाई पनि बोलाउनुभयो । सबैले मलाई पठाउने निर्णय गरे ।
बुधबार बसेको अखिल क्रान्तिकारीको बैठकले पनि मलाई फिर्ता पठाउने निर्णय गर्यो । मलाई फिर्ता पठाउनेबारे बुबा अझै सन्तुष्ट हुनुहुन्नथियो । आफ्नो राजनीतिक भविष्यको उहाँलाई चिन्ता थियो । तर, उहाँलाई सबैले सम्झाए । आएपछि यसरी फर्कन पाउँछु जस्तो मलाई लागेकै थिएन । तर, सबैको साथ र सहयोगले म फेरि पढ्न जाँदैछु । यसको लागि विशेष गरेर सबै सञ्चारमाध्यमलाई धन्यवाद दिन चाहान्छु । मलाई बुबाले बोलाउनुभएको थियो, तर सबै मिलेर पठाए ।
अब त मलाई झन् बढी जिम्मेवारी र उर्जा थपिएको छ । मेरो पढाईको चिन्ता सबैले गर्नुभएको छ । म कसैलाई निराश बनाउँदिन । अब साढे चारवर्ष पछि मेरो अध्ययन सकिन्छ । पढेर स्वदेश र्फकन्छु र दुर्गम गाउँमा बसेर स्वास्थ्य सेवामा लाग्नेछु ।
