फेसबुकका संस्थापक मार्क जुकरवर्गको सम्पतिले गुगलका संस्थापकद्वय ल्यारी पेज र सेर्गेइ बिनको सम्पतिलाई उछिनेको समाचार आएकै साता फेसबुक र गुगलको प्रतिस्पर्धा चरमचुलीमा पुगेको छ। फेसबुक त्यति लोकप्रिय नहुँदै गुगलले सोसल नेटवर्किङ साइट ओर्कुट खरिद गरेको थियो। तर ओर्कुट प्रतिस्पर्धामा टिक्न सकेन। त्यसपछि गुगलले जीमेलभित्रै सोसल नेटवर्किङको प्रयोग थाल्न ‘बज’ सुरु गर्यो। यसलाई पनि प्रयोगकर्ताहरुले खासै नरुचाएपछि फेसबुकको बढ्दो प्रतिस्पर्धालाई चुनौति दिन गुगलले अहिले ल्याएको छ गुगल+। यस पटक गुगल पूरै तयारीका साथ मैदानमा उत्रिएको छ, जसका कारण फेसबुकले पनि खतरा महसूस गरी स्काइपसँग मिलेर भिडियो च्याटको सुविधा दिने घोषणा गरेको छ।
फेसबुकको भिडियो च्याट
फेसबुकले बुधबार राति अबेरदेखि भिडियो च्याटको सुविधा दिन थालेको हो। भिडियो च्याट गर्न एउटा सानो सफ्टवेयर इन्सटल गर्नुपर्छ। आज फेसबुकको भिडियो च्याटको एक जना साथीसँग परीक्षण गरेको थिएँ। त्यति सन्तुष्ट भने भइनँ। अडियोमा निकै समस्या थियो। भिडियो भने स्पष्ट नै देखिन्थ्यो। स्काइप मै जाँदा भने अडियो स्पष्ट सुनिन्थ्यो। स्काइपसँगको साझेदारीमा फेसबुकले भिडियो च्याट ल्याएको भए पनि अडियोको लागि अझै सुधार गर्नुपर्ने देखिएको छ।
के छ नयाँ गुगल+ मा ?
गुगल+को स्ट्रिम र फेसबुकको न्युजफिड जुम्ल्याहा जस्तै देखिन्छ जसमा साथीहरुले पोस्ट गरेका स्टायटस, फोटो, भिडियो र लिङ्क देखिन्छ। कसैले राखेको सामाग्री मनपर्दा फेसबुकमा लाइक गरिन्छ तर गुगल+मा यसलाई +1 नाम दिइएको छ। फेसबुकमा कसैको स्टायटस मन पर्यो भने लाइक गर्नुबाहेक अरु उपाय रहन्न। ट्विटरमा भए रिट्विट गर्न पाइन्छ। गुगल+मा भने रिट्विट जस्तो पुनः आफ्नो स्ट्रिममा त्यो स्टायटसलाई सेयर गर्न पाइन्छ। यो पनि मलाई गुगल+को राम्रो विशेषता लाग्यो।
अब आफन्तलाई साथी भन्नु परेन
फेसबुकमा साथी भनेको साथी हो, त्यसको कुनै वर्गीकरण छैन। साथी हुन उमेर र नाताले कुनै छेकबार लाउँदैन भन्ने आदर्शवादी सिद्धान्त पछ्याउँछ फेसबुकले। तर गुगल+ले भने तपाइँलाई आफ्नो सोसल नेटवर्कमा विभिन्न सर्कल बनाउने सुविधा दिन्छ। मतलब तपाइँकी आमा, सानीआमा, काका र दाजुभाइ, दिदिबहिनीलाई पनि फेसबुकले साथी नै भन्छ, तर प्लसमा भने तपाइँलाई अलग अलग सर्कलमा उनीहरुलाई राख्ने सुविधा दिन्छ। तपाइँको अफिसमा सँगै काम गर्ने साथी फ्रेन्ड्स सर्कलमा र तपाइँका आफन्त फेमिली सर्कलमा हुनेछन्। तँतँ मम चल्ने साथीहरुलाई तपाइँ छुट्टै आफ्नै नाम दिएर अर्को सर्कल बनाउन सक्नुहुन्छ, जसमा तपाइँ धित मरुन्जेल कुरा गर्न सक्नुहुनेछ, जसलाई अरु साथी र आफन्तले देख्न पाउने छैनन्। अफिसका कुरा अफिसकै साथीले मात्र थाहा पाउने, आफन्तहरुले थाहा नपाउने गरी पोस्ट गर्न पनि पाइनेछ। आफूले आयड गरेका सबै साथीहरुले थाहा पाउला भनी पोस्ट गर्न डराउनेहरुलाई प्लसको यो सुविधा वरदान साबित हुनसक्छ। कुनै व्यक्तिलाई आयड गर्न मन छैन, तर उसले लेख्ने स्टायटस थाहा पाउने मन छ भने ट्विटरमा जस्तो फलो गर्ने सुविधा पनि प्लसले दिन्छ। फेसबुकले गुगल+को यो सुविधालाई ध्यानमा राखेर केही परिवर्तन भविष्यमा गर्न जरुरी पक्कै पनि ठान्नेछ।
१० जनासित सामूहिक भिडियो च्याट
अरुभन्दा फरक यसको विशेषता के हो भने यसमा १० जनासम्मले सामूहिक भिडियो च्याट गर्न सक्छन्। फेसबुकको जस्तो च्याट मात्रै गर्न चाहनु हुन्छ भने पनि त्यो सुविधा प्लसमा छ। गुगल अकाउन्ट अर्थात् जीमेलमा रहेका साथीहरुलाई नै यसले च्याट गर्ने सुविधा दिन्छ। ह्याङआउटमा १० जनासम्मको सामूहिक भिडियो च्याट हुने भनिए पनि मैले त्यसको प्रयोग गरी हेरेको छैन। भिडियो च्याट गर्दा भिडियोको गुणस्तर त्यति राम्रो भने देखिनँ।
स्पार्कस्
गुगल+ले गरेको यो अर्को प्रयोग हो। यसलाई गुगलले अनलाइन सेयरिङ इन्जिन भनेको छ। इन्टरनेटमा धेरै विषय हुन्छन्। कसैलाई फेसनमा रुचि हुन्छ, कसैलाई समाचारमा। कसैलाई खेलमा त कसैलाई साहित्यमा। तपाइँलाई जुन विषयमा रुचि छ, त्यो विषय थप्नुस्, अनि स्पार्कस्ले इन्टरनेटमा खोजेर तपाइँलाई फिड उपलब्ध गराउँछ। ४० भन्दा बढी भाषामा तपाइँको रुचि अनुसारको सामाग्री खोजर तपाइँलाई दिनेछ। तपाइँ यसलाई पढ्नुस्, राम्रो लागे सेयर गर्नुस्। नयाँ सुविधा त हो यो, तर फिड रिडरको जस्तो काम मात्रै यसले गर्छ। फिडरिडर पहिले नै प्रयोग गरिरहेकाहरुलाई यो खासै कुनै नयाँ सुविधा हैन।
हड्ल
आआफ्नै काममा व्यस्त हुने हुनाले समयको अभाव व्यस्त सहरी जीवनमा साथीभाइ र आफन्तसँग सम्पर्कमा रहिरहन निकै गाह्रो हुन्छ। फोन गरेर वा एसएमएस गरेर अथवा इमेल गरेर सम्पर्कमा रहिरहन सँधै संभव हुन्न। यही असहजपनालाई ध्यानमा राख्दै प्लसले हडललाई प्रयोगमा ल्याएको छ। यो एउटा ग्रुप मेसेजिङ सिस्टम हो। आफ्नो सर्कलमा रहेका सबैलाई तपाइँ एकै पटक एउटै सन्देश तुरुन्त पठाउन यसले सजिलो बनाइदिनेछ।
अब सुरु हुनेछ वास्तविक प्रतिस्पर्धा
अहिलेसम्मका सबै प्रतिस्पर्धीहरुलाई फेसबुकले पछार्न सफल भएको छ। तर गुगलको यो नयाँ उत्पादन परीक्षण कालमा रहँदा नै चुनौतिपूर्ण देखिएको छ। फेसबुक आफैले पनि अब आफूले प्रतिस्पर्धा गर्नुपर्ने तथ्य स्वीकार गरेको देखिएको छ। विश्वभरका ६० करोड प्रयोगकर्ता रहेको फेसबुक प्रयोगकर्तालाई खोस्नु त्यति सजिलो काम पक्कै हैन। तर गुगलका भक्तहरु पनि कम भने छैनन्। सर्च गुगलमा गर्ने, च्याट गुगलमा गर्ने र इमेल गुगल कै जीमेल चलाउने र ब्लग गुगल कै ब्लगस्पटमा चलाएर ब्राउजर पनि गुगल कै क्रोममा चलाउनेहरुको संख्या करोडौँ छन्। त्यसैले गुगल कै अर्को एउटा उत्पादनलाई उनीहरुका लागि स्वभावतः सजिलो छनौट हुनसक्छ। हटमेल र याहू मेलको जगजगी रहेको बेला गुगलले ल्याएको जीमेलले ल्याएको परिवर्तनको उदाहरण पनि छ। त्यसो भए पनि चलाउनमा सजिलो र नयाँ सुविधा नभएसम्म प्रयोगकर्ताहरु चलाइरहेको कुरा छाडेर अर्कोमा जाने छैनन्। गुगल+ले फेसबुक र टि्वटरमा रहेका सुविधाहरुको मिश्रण र नयाँ सुविधा थपेको हुनाले यसको भविष्य उज्ज्वल रहेको आशा गर्न सकिन्छ। सँगै प्रतिस्पर्धामा कायम रहन फेसबुकले पनि नयाँ सुविधा थप्दै जाने निश्चित छ, जसबाट लाभ हामी प्रयोगकर्तालाई नै हुनेछ।
तपाईँ चाहिँ फेसबुक रुचाउनु हुन्छ कि गुगल+ ? फेसबुक रुचाउने भए तल फेसबुक लाइकमा क्लिक गर्नुस् अनि गुगल+ रुचाउने भए +1 मा
