भागेर बिहे गरेलगत्तै जीवन रक्षाका लागि मिडियामा सार्वजनिक अपील पठाए पनि आखिर दलित जनजाति पार्टीका अध्यक्ष तथा सभासद् विश्वेन्द्र पासवानले आफ्ना ज्वाइँलाई बेपत्ता पारेरै छाडेका छन्। यो आरोप अरुले हैन, उनकै छोरी विधिया पासवानले लगाएकी हुन्। विधियाले विवाह गरेर घर बसाउने तयारी गरिरहँदा पिता विश्वेन्द्रले पेसेवर गुण्डा लगाएर आफ्ना श्रीमान् राजलाल खंगलाई बेपत्ता पारेको आरोप लगाएकी हुन्। काठमाडौँमै विवाह गरेर विराटनगर हुँदै पोखरा पुगेपछि गुण्डाहरूले आफूलाई नियन्त्रणमा लिएर श्रीमान् खंगलाई बेपत्ता बनाएको उनको आरोप छ।
श्रीमानलाई बेपत्ता बनाएपछि उनलाई खोज्दै उनी ससुराली घर पुगेकी छिन्। ‘श्रीमानको घरमा मलाई सबैले स्वीकार गरिसकेको छ। तर सभासद् आफ्नै बुबाले जीवन बर्बाद गर्न लागेका छन्,’ उनले भनिन्।
असार १५ गते दलित जनजाति पार्टी कार्यालयमा काम गर्ने सप्तरीको शम्भुनाथ गाविस १ बस्ने २३ वर्षीय राजलाल खंगसँग भागेर १८ वर्षीया विधियाले विवाह गरेकी हुन्। काठमाडौँको पशुपतिनाथ मन्दिरमा असार १६ गते हिन्दु परम्पराअनुसार विवाह गरेको बताउँदै विधियाले राजलालबिना बाँच्न नसक्ने बताइन्।
आफूहरू उमेर पुगेका बालिग भएकाले राजीखुसीसँग बिहे गरेको उनको जिकिर छ।
‘बुवाले राजलाललाई राजविराज एक बैठकमा पठाएको बताए पनि श्रीमान्का साथी बिरजु मण्डलबाट पोखराबाटै प्रहरीले नियन्त्रणमा लिएको आफूले जानकारी पाएको छु’, उनले भनिन्, अहिले म बिचल्लीमा परेको छु’।
आफूलाई पोखराबाट लिएर गएपछि बुबा बैठकमा गएको मौका छोपेर सप्तरीको शम्भुनाथस्थित ससुराली आइपुगेको उनको भनाइ छ।
‘बुबाले काठमाडौं लगेपछि राजलालसँग मिलाइदिने भन्नुभएको थियो’, उनले भनिन् – तर श्रीमान्लाई झुटो मुद्दा लगाएर कडा कारबाही गराउन बुबा प्रयासरत रहेको थाहा पाएपछि म घरबाट भागेकी हुँ।
सोही अवसरमा राजलालको ठूलो बुवाका छोरा शिवराम मण्डलले सभासद् पासवानको दवावमा आफ्नो परिवारमाथि प्रहरीले दमन गरेको बताए। विश्वेन्द्र पासवानले अपहरणको मुद्दा दायर गरेपछि आफ्नो बुबा बिन्दी खंग र बहिनी ललितालाई प्रहरीले पक्राउ गरी लगेको उनले बताए।
