सरकारले निवृत्तभरण (पेन्सन) बैंक खातामार्फत दिने घोषणा गरे पनि सेवाग्राहीले नयाँ खाता खोल्नैपर्ने झन्झट थपिदिएको छ । सम्बन्धित बैंकमा आफ्नो खाता भए पनि पेन्सनका लागि अलग्गै खाता खोल्नुपर्ने निवृत्तभरण व्यवस्थापन कार्यालयले जनाएको छ । पेन्सनका लागि खोलिएको त्यस्तो खातामा अन्य रकम राख्नसमेत पाइँदैन ।
अनिवार्यरुपमा नयाँ बैंक खाता खोल्नुपर्ने भएपछि पेन्सन लिने व्यक्तिलाई पुनः खाता खोल्नका लागि झन्झट बेहोर्नुपर्ने भएको छ । निवृत्तिभरण कार्यालयले नेपाल राष्ट्र बैंक, नेपाल वाणिज्य बैंक र नेपाल बैंकका शाखामा खाता खोल्नुपर्ने बताएकोछ । अहिलेसम्म सेवानिवृत्त कर्मचारी तथा तिनका परिवारले यिनै तीन बैंकबाट पेन्सन पट्टा देखाई लाइन लागेर नगद रकम बुझ्ने गरेका छन् ।
बैंकमा खाता खोल्नका लागि पेन्सन लिने व्यक्तिहरुले जिल्ला कोष तथा लेखा नियन्त्रण कार्यालयको सिफारिस लिनुपर्ने हुन्छ । आ-आफ्नो जिल्लामा रहेको कोष तथा लेखा नियन्त्रण कार्यालयमा गएर सिफारिस बनाई सोही सिफारिसका आधारमा बैंकमा खाता खोल्न निवृत्तभरण व्यवस्थापन कार्यालयले आग्रह गरेको छ । नयाँ खातामा पेन्सन झिक्ने सुविधामात्र उपलब्ध हुने हुँदा अन्य कुनै रकम राख्न पाइने छैन, जसले गर्दा सेवाग्राहीले दुईवटा खाता चलाउनुपर्ने भएको छ ।
पेन्सन खाताको आयु जम्मा ६ महिनाको मात्रै हुने हुँदा सेवाग्राहीले प्रत्येक ६/६ महिनामा पेन्सन पट्टासहित बैंकमा आफै उपस्थित भएर खाता नवीकरण गराउनुपर्ने अर्को झण्झट छ । खाता खोल्न र सक्रिय बनाउन सम्बन्धित व्यक्ति नै उपस्थित हुनुपर्ने हुँदा दुरदराजमा रहेका तथा असक्त व्यक्तिलाई यो नीतिले सजिलो भन्दा पनि अप्ठ्यारो गराउने देखिएको छ ।
पेन्सन खाता खोल्न आवश्यक कागजपत्र :
खाता खोल्नका लागि सक्कल पेन्सन अधिकार पत्र, पेन्सन अधिकारपत्रको संसोधनसहितका पानाहरु र अन्तिमपटक भुक्तानी लिएको पानाको फोटोकपी २ प्रति आवश्यक पर्ने बताइएको छ । सम्बन्धित जिल्लाको कोष तथा लेखा नियन्त्रक कार्यालय वा पेन्सन व्यवस्थापन कार्यालयबाट बैंक खाता खोलिदिनका लागि जारी गरेको पत्र र हालसालै खिचेको पासपोर्ट साइजको फोटो २ थान लिएर जानुपर्ने हुन्छ ।
एटीएम कार्ड निकाल्ने भए थप एक प्रति फोटो बुझाउनुपर्ने बताइएको छ । पेन्सन खातावाललाई एटीएम र चेकबुकको सुविधासमेत दिइने बताइएको छ । खाता खोल्न र नवीकरण गर्न झण्झट भएता पनि एटीएम र चेकको सुविधाका कारण ६ महिनासम्म खाताबाट पैसा निकाल्न भने सहज हुने देखिएको छ ।
