रुबेलले काठमाडौंमा पत्रकार सम्मेलन गर्ने
सुवास पण्डित
८ चैत्र, चितवन । बंगलादेशी नागरिक रुबेल चौधरीलाई गोली चलाएको अभियोगमा सार्बजनिक मुद्दा खेपेका पूर्वयुवराज पारस शाह मंगलबार चितवन जिल्ला प्रशासन कार्यालयमा उपस्थित हुनु भएको छ । उहाँ दलबलका साथ बा १ च ५६२४ नम्बरको गाडीबाट १२ बजेर ३६ मिनेटमा जिल्ला प्रशासन कार्यालय पुग्नु भएको हो ।
पारसलाई आँपटारीमा जम्मा भएका सयौं समर्थकहरुले गाडी र मोटरसाइकलको बीचमा पारेर जिल्ला प्रशासन कार्यालयसम्म पुर्याएका थिए । जिल्ला प्रशासन कार्यालय बाहिर जम्मा भएका पारसका समर्थकहरुले ‘राजा आउ देश बचाउ’, ‘रुबेललाई फाँसी दे,’ जस्ता नारा लगाइरहेका छन् ।
पूर्वयुवराज पारसले चौधरीलाई चितवनको मेघौलीस्थित टाईगरटप्स होटलमा गत मंसिर २५ गते गोली चलाएको र सार्बजनिकस्थलमा होहल्ला गरेको अभियोगमा जिल्ला प्रशासन कार्यालयमा सार्बजनिक अपराध ऐन अन्तर्गतको मुद्दा चलाइएको छ ।
रुबेलले बयान फेरे
यसैबीच टाईगरटप्स गोलीकाण्डमा मुछिएका बंगलादेशी नागरिक रुवेल चौधरीले जिल्ला प्रसासन कार्यालय चितवनमा आज बयान फेर्नु भएको छ । बिहान साढे १० बजे दलबलका साथ प्रशासन कार्यालय पुग्नु भएका चौधरीले चितवनका प्रमुख जिल्ला अधिकारी बसन्तराज गौतमसमक्ष बयान दिँदै आफूमाथि गोली चलाउने व्यक्तिलाई नचिनेको बयान दिनु भएको हो ।
‘पारसको हातमा बन्दुक थियो तर म माथि कस्ले गोली चलायो थाहा भएन,’ घटनाको मुख्य साक्षीको रुपमा वादीको तर्फबाट बयान दिँदै चौधरीले भन्नुभयो । उहाँले पारससँग आफ्नो कुनै दुश्मनी नभएको पनि बयान दिनुभएको थियो ।
‘होटलमा सामान्य भनाभन भएको थियो । मैले यसलाई कानुनी दायरामा ल्याउन चाहेको थिइनँ,’ चौधरीले भन्नुभयो । उहाँले घटनाबारे काठमाडौंमा पत्रकार सम्मेलन गरी जानकारी गराउने उहाँका वकिलहरुले जानकारी दिएका छन् ।
गोलीकाण्ड भएको भोलीपल्ट उहाँले संचारकर्मी माझ पारसले आफूलाई लक्षित गरी हवाई फायरिङ गरेको तर भगवानले बचाएको बताउनु भएको थियो । अहिले ‘भनाभन मात्रै भएको’ भनेर बयान दिनु आफू मुद्दामा फँस्ने डरले आएको अभिव्यक्तिको रुपमा लिइएको छ । चौधरी कांगे्रस नेतृ सुजाता कोइरालाको छोरी ज्वाई हुनुहुन्छ ।
मुद्दाको पेशी सर्ने
मुद्दाको फैसला मंगलबार हुने सम्भावना कम रहेको छ । सम्भवत मुद्दाको अर्को पेशी आउँदो १८ गते तोकिने वकीलहरुले जानकारी दिएका छन् । सन्चारकर्मी र सर्बसाधारणको जिल्ला प्रशासन कार्यालय भरतपुरमा भीड लागेको छ ।
पारसको पक्षमा चितवनका वकिल शिवबहादुर पाण्डे, वुद्धि गौतम, चुडामणि सापकोटा, काठमाडौंका गणेश केसी, श्रीप्रसाद पण्डित, विष्णु भटट्राई, हिरा रेग्मीले बहस गरिसक्नु भएको छ । चौधरीमाथि फायरिङ गर्दै सार्बजनिक स्थानमा होहल्ला गरेको अभियोगमा पक्राउ परेका पूर्वयुवराज शाहलाई गत पुस १ गते १० हजार रुपैयाँ धरौटीमा छाडिएको थियो ।
