|
समानुपातिकतर्फको मतगणना अन्तिम चरणमा पुगिसक्दा कांग्रेस र एमालेको कूल सिट मिलाएर दुई तिहाइ बहुमत नपुग्ने झण्डै निश्चित भएको छ। समानुपातिकको सबै मत आज गन्न सकिने निर्वाचन आयोगले जनाएको छ। बिहान ९ बजे ५७ मिनेटमा आयोगले उपलब्ध गराएको ८७ लाख ९ हजार ८३ मतलाई अन्तिम मानी संविधान सभा निर्वाचन अध्यादेश २०७० ले व्यवस्था गरेको गणना विधि अनुसार सिट बाँडफाँड गर्दा कांग्रेस र एमालेको कूल सिट १९६ र १७६ हुने देखिन्छ। दुवै जोड्दा दुई तिहाइ बहुमतका लागि २९ सिटको अभाव हुनेछ। संविधानका प्रत्येक धारा दुई तिहाई बहुमतले अनुमोदन गर्नुपर्ने प्रावधान छ। समानुपातिकको मतगणनाको अन्तिम परिणाम आइनसके पनि अब थोरै मत गन्न मात्रै बाँकी रहेकोले अब एक दुई सिटको अन्तरबाहेक यो हिसाबमा ठूलो परिवर्तन नहुने निश्चित छ। हालसम्मको गणनालाई आधार बनाउँदा माओवादीले समानुपातिकमा ५३ र प्रत्यक्षमा २६ गरी कूल ७९ सिट ल्याउने देखिन्छ। अन्तरिम संविधानमा रहेको गणतन्त्र नै नमान्ने राजतन्त्र फर्काउन चाहने राप्रपा नेपाल प्रत्यक्षतर्फ निल भए पनि समानुपातिकमा २४ सिटमा रहनेछ। प्रत्यक्षमा ३ सिट जितेको राप्रपाले समानुपातिकमा १० सिट जिती १३ सिट जित्नेछ। संघीयताको विरोध गर्ने चित्रबहादुर केसीको जनमोर्चा समानुपातिकमा ३ सिटमा झर्नेछ। अघिल्लोमा यो पार्टीले प्रत्यक्षतर्फसमेत सिट जितेको थियो। संघीयताकै पक्षमा एमाले फुटाउने अशोक राईको संघीय समाजवादीले समानुपातिकबाट मात्रै ५ सिट पाउनेछ। मधेसवादी दलहरुको यो चुनावमा प्रत्यक्षतर्फ समग्र परिणाम निराशाजनक भए पनि सबै मधेसवादी दलहरु एक भए भने अझै संविधान सभामा चौथो शक्तिको रुपमा रहने प्रोजेक्सनले देखाउँछ। प्रत्यक्ष र समानुपातिक दुवैमा गरी उनीहरुको एकीकृत सिट ४७ पुग्ने हालसम्मको गणनाले देखाउँछ। एकल हिसाबमा चौथो शक्ति रहेको राप्रपा नेपालको सिट २३ मात्रै छ। यसले मधेसवादी दलहरु अझै पनि आफ्ना मुद्दालाई दबाबका रुपमा अघि बढाउन सक्षम स्थितिमा रहेको देखाउँछ। कांग्रेस र एमालेले मात्रै दुई तिहाई बहुमत पुर्याउन नसक्ने भएकोले यस पटकको संविधान सभाले पनि संविधान बनाउन निकै चुनौतिको सामना गर्नुपर्ने र दलहरुले चुनावअघि भन्दै आएको जस्तो एक वर्षभित्र संविधान जारी गर्ने काम कठिन हुने देखिन्छ। बिहान ९ बजे ५७ मिनेटमा आयोगले उपलब्ध गराएको ८७ लाख ९ हजार ८३ मतलाई अन्तिम मानी संविधान सभा निर्वाचन अध्यादेश २०७० ले व्यवस्था गरेको गणना विधि अनुसार सिट बाँडफाँड गर्दा निम्न सिट संख्या हुने देखिन्छ- (अन्तिम परिणाम आएसँगै सिटमा सामान्य तलमाथि हुनसक्छ)
|
Wednesday, November 27, 2013
कांग्रेस-एमालेको दुई तिहाई नपुग्ने निश्चित, एकीकृत रुपमा मधेसवादी चौथो शक्ति By Salokya, - mysansar
